കണ്ണിനെ അടുത്തറിയാം


പ്രകൃതിയുടെ ഈ വര്‍ണവൈവിധ്യം നിറഞ്ഞ  സൗന്ദര്യത്തെ മനസ്സിലേക്ക് പകര്‍ത്തി എന്നും വസന്തകാലമൊരുക്കിത്തരുന്നത് നമ്മുടെ പ്രിയപ്പെട്ട കണ്ണുകളാണ്. കാഴ്ച എന്ന അനുഭവം ഉണ്ടാകുന്നില്ലെങ്കില്‍ ജീവിതം ഏറെ ദുസ്സഹമായിരിക്കും. അന്ധരായി ജനിക്കുന്നവര്‍, നന്നായി കണ്ടിട്ടും പിന്നീട് എവിടെവെച്ചോ കാഴ്ച നഷ്ടപ്പെട്ടവര്‍, അശ്രദ്ധമൂലം കാഴ്ചശക്തി നഷ്ടമായവര്‍ തുടങ്ങി നിരവധി പേര്‍ നമുക്കുചുറ്റും ജീവിക്കുന്നുണ്ട്. ജീവിത തിരക്കുകള്‍ക്കിടയില്‍ വേണ്ടപോലെ  പരിചരണം ലഭിക്കാതെ അന്ധതയിലേക് നടന്നുനീങ്ങുന്നവരാണ് ബഹുഭൂരിഭാഗവും. ഒരു ലോക അന്ധദിനം പടികടക്കുമ്പോള്‍ കണ്ണിനെക്കുറിച്ചും സംരക്ഷണത്തെക്കുറിച്ചും ഓര്‍മപ്പെടുത്തുകയാണ് ഇവിടെ .

കണ്ണിന്‍െറ സംരക്ഷണം
നേത്രകോടരം എന്ന കുഴിക്കകത്ത് മൂന്ന് ജോടി പേശികളെക്കൊണ്ടാണ് കണ്ണിനെ ഉറപ്പിച്ചുനിര്‍ത്തിയിരിക്കുന്നത്.
കണ്‍പീലികളോടുകൂടിയ കണ്‍പോളകള്‍ കണ്ണിനെ ബാഹ്യക്ഷതങ്ങളില്‍നിന്നും സംരക്ഷിക്കുന്നു.
കണ്ണുനീര്‍ ഗ്രന്ഥി ഉല്‍പാദിപ്പിക്കുന്ന കണ്ണുനീര്‍ കണ്ണിലെ പൊടിപടലങ്ങളെ കഴുകിക്കളയുന്നു.
ലൈസോസൈം
കണ്ണുനീരിലടങ്ങിയ ജീവാഗ്നിയാണ് ലൈസോസൈം. ഇത് കണ്ണിലകപ്പെടുന്ന രോഗാണുക്കളെ നശിപ്പിക്കുന്നു. അവശ്യ സന്ദര്‍ഭങ്ങളില്‍ കൂടുതല്‍ ലൈസോസൈം ഉല്‍പാദിപ്പിച്ച് കണ്ണ് രോഗാണുക്കള്‍ക്കെതിരെ പോരാട്ടം നടത്തുന്നു.
അടുത്തും അകലെയുമുള്ള വസ്തുക്കളെ കാണുമ്പോള്‍
അടുത്തും അകലെയുമുള്ള വസ്തുക്കളെ കാണുമ്പോള്‍ കണ്ണിനകത്ത് പരസ്പര വിപരീത പ്രവര്‍ത്തനമാണ് നടക്കുന്നത്.
അകലെയുള്ള വസ്തുക്കളെ കാണുമ്പോള്‍ സീലിയറി പേശികള്‍ അയയുകയും  സ്നായ്ക്കള്‍ ചുരുങ്ങുകയും ലെന്‍സിന്‍െറ വക്രത കുറയുകയും ഫോക്കസ്ദൂരം കൂടുകയും ചെയ്യുന്നു.
അടുത്തുള്ള വസ്തുക്കളെ കാണുമ്പോള്‍ സീലിയറി പേശികള്‍ ചുരുങ്ങുകയും സ്നായ്ക്കള്‍ അയയുകയും ലെന്‍സിന്‍െറ വക്രത കൂടുകയും ഫോക്കസ്ദൂരം കുറയുകയും ചെയ്യുന്നു.
അക്വസ് ഹ്യൂമറും വിട്രിയസ് ഹ്യൂമറും
കണ്ണില്‍ ലെന്‍സിനും കോര്‍ണിയക്കും ഇടയില്‍ കാണപ്പെടുന്ന അറയാണ് അക്വസ് ചേംബര്‍ അഥവാ ജലീയ അറ. ഇതിനകത്ത് നിറഞ്ഞിരിക്കുന്ന ദ്രാവകമാണ് അക്വസ് ഹ്യൂമര്‍. കണ്ണിലെ കലകള്‍ക്ക് ഓക്സിജനും പോഷകവസ്തുക്കളും പ്രധാനം ചെയ്യുക എന്നതാണ് അക്വസ് ഹ്യൂമറിന്‍െറ ധര്‍മം.
ലെന്‍സിനു പിറകിലുള്ള ഭാഗമാണ് വിട്രിയസ് ചേംബര്‍ അഥവാ സ്ഫടിക അറ. ഇതിനകത്ത് നിറഞ്ഞിരിക്കുന്ന ദ്രാവകമാണ് വിട്രിയസ് ഹ്യൂമര്‍. കണ്ണിന്‍െറ സ്വാഭാവിക ആകൃതി നിലനിര്‍ത്തുക എന്നതാണ് ഇതിന്‍റ ധര്‍മം.
ഐറിസ്
രക്തപടലത്തിന്‍െറ തുടര്‍ച്ചയായി ലെന്‍സിനു മുന്നില്‍ മറപോലെ കാണുന്ന ഭാഗമാണ് ഐറിസ്. ഐറിസിന് നിറംകൊടുക്കുന്ന വര്‍ണവസ്തുവാണ് മെലാനിന്‍. മെലാനിന്‍െറ വ്യത്യാസം അനുസരിച്ച് ഐറിസിന്‍െറ നിറത്തില്‍ വ്യത്യാസം ഉണ്ടാകുന്നു. എല്ലാ ആളുകളുടെയും ഐറിസിന്‍െറ നിറം ഒരുപോലെയല്ല.
മെലാനിന്‍
ഐറിസില്‍ അടങ്ങിയിരിക്കുന്ന മെലാനിന്‍ വ്യത്യസ്ത തരത്തിലുള്ളവയാണ്. യുമെലാനിന്‍, ഫൈക്കോ മെലാനിന്‍ എന്നിവ ഉദാഹരണങ്ങളാണ്. എല്ലാതരം മെലാനിനും അതാര്യമായതിനാല്‍ പ്രകാശത്തെ തടഞ്ഞുനിര്‍ത്തുന്നതില്‍ വ്യത്യസ്ത കണ്ണുള്ളവരില്‍ വ്യത്യാസങ്ങളൊന്നും കാണുന്നില്ല. എന്നാല്‍, ആല്‍ബിനിസം ബാധിച്ച വ്യക്തികളില്‍ ഐറിസില്‍ മെലാനിന്‍ ഇല്ലാത്തതുകൊണ്ട് അവര്‍ക്ക് തീവ്ര പ്രകാശത്തെ അഭിമുഖീകരിക്കാന്‍ സാധിക്കയില്ല.
സമഞ്ജനക്ഷമത
കണ്ണില്‍നിന്ന് വസ്തുവിലേക്കുള്ള ദൂരം അനുസരിച്ച് ലെന്‍സിന്‍െറ വക്രതയില്‍ മാറ്റംവരുത്തി ഫോക്കസ് ദൂരം ക്രമീകരിക്കുവാനുള്ള കണ്ണിന്‍െറ കഴിവാണ് സമഞ്ജനക്ഷമത.
കണ്ണിലെ ലെന്‍സ് റിബണ്‍പോലെ നീണ്ട എപ്പിത്തീലിയല്‍ കോശങ്ങളെക്കൊണ്ട് നിര്‍മിതമാണ്. ഇവക്ക് പോഷണം നല്‍കുന്നതിന് രക്തക്കുഴലുകള്‍ ഇല്ല. പോഷണം അക്വസ് ദ്രവത്തില്‍നിന്നു ലഭിക്കുന്നു. ഗ്ളൂക്കോസില്‍നിന്നും അവായുശ്വസനംവഴി ഊര്‍ജം നിര്‍മിക്കുന്നു.
ലെന്‍സ് (Lence)
കണ്ണിലെ ലെന്‍സ് കോണ്‍വെക്സ് ലെന്‍സാണ്. സുതാര്യമായ ഒരു കാപ്സ്യൂളിനകത്താണ് ലെന്‍സ് സ്ഥിതിചെയ്യുന്നത്. കാപ്സ്യൂളിന്‍െറ വശങ്ങള്‍ ലിഗ്മെന്‍റുകള്‍ ഉപയോഗിച്ച് സീലിയറി പേശിയുമായി ബന്ധിച്ചിരിക്കുന്നു. അടുത്തുള്ള ഒരു വസ്തുവിനെ നോക്കുമ്പോള്‍ റിഫ്ളക്സ് പ്രവര്‍ത്തനംമൂലം സീലിയറി പേശികള്‍ സങ്കോചിക്കുന്നു. ഇതിന്‍െറ ഫലമായി ലെന്‍സിന്‍െറ വക്രത കൂടുന്നു.
ദീര്‍ഘദൃഷ്ടി (Long Sight)
അകലെയുള്ള വസ്തുക്കളെ വ്യക്തമായി കാണുകയും അടുത്തുള്ളവയെ കാണാതിരിക്കുകയും ചെയ്യുന്ന അവസ്ഥയാണിത്. നേത്രഗോളത്തിന്‍െറ വക്രത കുറയുന്നതുമൂലം വസ്തുവിന്‍െറ പ്രതിബിംബം റെറ്റിനക്കുപിറകില്‍ കേന്ദ്രീകരിച്ചാണ് ഈ തകരാര്‍ ഉണ്ടാകുന്നത്. അനുയോജ്യമായ ഫോക്കസ്ദൂരമുള്ള കോണ്‍വെക്സ് ലെന്‍സ് ഉപയോഗിച്ച് ഈ തകരാര്‍ പരിഹരിക്കാം.
ഹ്രസ്വദൃഷ്ടി (Short Sight)
അടുത്തുള്ള വസ്തുക്കളെ വ്യക്തമായി കാണുകയും അകലെയുള്ളവയെ കാണാതിരിക്കുകയും ചെയ്യുന്ന അവസ്ഥയാണിത്. നേത്രഗോളത്തിന്‍െറ വക്രത കൂടുന്നതുകൊണ്ട് വസ്തുവിന്‍െറ പ്രതിബിംബം റെറ്റിനക്കു മുന്നില്‍ കേന്ദ്രീകരിച്ചാണ് ഈ തകരാര്‍ ഉണ്ടാകുന്നത്. കോണ്‍കേവ് ലെന്‍സുള്ള കണ്ണട ഉപയോഗിച്ച് ഇത് പരിഹരിക്കാം.
വിഷമദൃഷ്ടി
ഒരു നിശ്ചിതബിന്ദുവില്‍ കേന്ദ്രീകരിക്കാത്ത അവസ്ഥയാണ് വിഷമദൃഷ്ടി. വസ്തുവില്‍നിന്നുള്ള പ്രതിബിംബം റെറ്റിനയില്‍ ഒന്നിലധികം സ്ഥാനങ്ങളില്‍ കേന്ദ്രീകരിക്കുമ്പോഴാണ് ഈ തകരാര്‍ ഉണ്ടാകുന്നത്. സിലിണ്ടറിക്കല്‍ ലെന്‍സ് ഉപയോഗിച്ച് ഈ തകരാര്‍ പരിഹരിക്കാം.
ഐറിസ് സംരക്ഷകന്‍
ശക്തിയേറിയ പ്രകാശം കണ്ണിനകത്തേക്ക് കടക്കുന്നത് തടഞ്ഞ് റെറ്റിനയെയും മറ്റ് ആന്തരഭാഗങ്ങളെയും സംരക്ഷിക്കുന്നതിനാണ് ഐറിസ് പ്രധാനമായും സഹായിക്കുന്നത്. ഐറിസിലെ മെലാനിനാണ് പ്രകാശത്തെ കടത്തിവിടാതിരിക്കാന്‍ സഹായകമാവുന്നത്.
തിമിരം
പ്രായം കൂടുന്നതിനനുസരിച്ച് നേത്രലെന്‍സ് അതാര്യമാകുന്ന തകരാറാണ് തിമിരം. ലെന്‍സിലെ കോശങ്ങളില്‍ 30 ശതമാനം പ്രോട്ടീന്‍ അടങ്ങിയിരിക്കുന്നു. സൂര്യപ്രകാശത്തിലെ അള്‍ട്രാവയലറ്റ് വികിരണങ്ങള്‍ തട്ടുന്നതിന്‍െറ ഫലമായി കാത്സ്യം അയോണുകളുടെ സാന്നിധ്യത്തില്‍ ഈ പ്രോട്ടീനുകള്‍ കൊയാഗുലേഷന്‍ എന്ന പ്രക്രിയക്ക് വിധേയമാകുന്നു. ഇതാണ് തിമിരത്തിന് കാരണം. രക്തത്തില്‍ ഗ്ളൂക്കോസിന്‍െറ അളവ് കൂടുന്നതിനനുസരിച്ച് ഈ പ്രവര്‍ത്തനം വേഗത്തിലാകുന്നു. അതുകൊണ്ട്, പ്രമേഹരോഗികളില്‍ തിമിരം ഉണ്ടാകുന്നു. ശസ്ത്രക്രിയ വഴി ഈ രോഗം പരിഹരിക്കാം.
പ്രസ്ബയോപിയ(Press Biopiya)
പ്രായംകൂടുന്നതിനനുസരിച്ച് ലെന്‍സിന്‍െറ ഇലാസ്തികത നഷ്ടമാകുന്ന അസുഖമാണ് പ്രസ്ബയോപിയ. അനുയോജ്യമായ കോണ്‍വെക്സ് ലെന്‍സ് ഉപയോഗിച്ച് ഇത് പരിഹരിക്കാം.
മൂങ്ങ, വവ്വാല്‍
മങ്ങിയ വെളിച്ചത്തില്‍ കാണാന്‍ സഹായിക്കുന്ന റോഡ്കോശങ്ങള്‍ ധാരാളമുള്ള ഇവക്ക് രാത്രികാലങ്ങളില്‍ നല്ല കാഴ്ചശക്തിയായിരിക്കും. എന്നാല്‍, തീവ്രപ്രകാശത്തില്‍ കാണാന്‍ സഹായിക്കുന്ന കോണ്‍കോശം ഇവയുടെ റെറ്റിനയില്‍ തീരെ ഇല്ലാത്തതുകൊണ്ട് പകല്‍ ഇവക്ക് കാഴ്ചശക്തിയില്ല.
അന്ധബിന്ദു, പീതബിന്ദു
കണ്ണില്‍ നേത്രനാഡി സന്ധിക്കുന്ന സ്ഥലത്ത് റോഡ്കോശവും കോണ്‍കോശവും തീരെയില്ല. കാഴ്ചശക്തി ഒട്ടുമില്ലാത്ത ഈ ഭാഗമാണ് അന്ധബിന്ദു (blind spot). റെറ്റിനയില്‍ ഒരു പ്രത്യേകസ്ഥലത്ത് കോണ്‍കോശങ്ങള്‍ ധാരാളമായി കാണുന്നു. എന്നാല്‍, ഇവിടെ റോഡ് കോശം വളരെ കുറവാണ്. കാഴ്ചശക്തി കൂടിയ ഈ ഭാഗമാണ് പീതബിന്ദു (yellow spot).
ചെങ്കണ്ണ്
ചെങ്കണ്ണ് വൈറസ്, ബാക്ടീരിയ എന്നിവമൂലം ഉണ്ടാകുന്നു. സ്പര്‍ശത്തിലൂടെയാണ് ഇത് പ്രധാനമായും പരക്കുന്നത്. ജലത്തിലൂടെയും പകരാനിടയുണ്ട്. രോഗിയുടെ ടവല്‍, പേന, പെന്‍സില്‍ എന്നിവ ഉപയോഗിക്കുന്നതുമൂലം കൈകളിലെത്തുന്ന രോഗങ്ങള്‍ കൈകള്‍ കണ്ണില്‍ മുട്ടിക്കുന്നതിനെ തുടര്‍ന്ന് ഉണ്ടാകുന്നു.
റോഡോപ്സിന്‍
വിറ്റാമിന്‍ എയില്‍ ധാരാളമായുള്ള റോഡോപ്സിന്‍ എന്ന വര്‍ണവസ്തുവാണ് റോഡ്കോശങ്ങള്‍ക്ക് മങ്ങിയവെളിച്ചത്തില്‍ കാഴ്ചശക്തി നല്‍കുന്നത്. അതിനാല്‍, വിറ്റാമിന്‍ എയുടെ അഭാവം റോഡോപ്സിന്‍ കുറയുന്നതിനും അതുവഴി നിശാന്ധതക്കും കാരണമാകുന്നു.
മങ്ങിയ വെളിച്ചത്തില്‍പോലും റോഡോപ്സിന്‍ വിഘടിച്ച് റെറ്റിനിനും ഓഫ്സിനുമായി മാറുന്നു. രാസപ്രവര്‍ത്തന ഫലമായുണ്ടാകുന്ന ഓഫ്സിന്‍ നാഡീകോശങ്ങളില്‍ ആവേഗങ്ങളെ സൃഷ്ടിക്കാന്‍ ഇടയാക്കുന്നു. റോഡോപ്സിന്‍െറ പുനര്‍നിര്‍മാണം പ്രകാശത്തിന്‍െറ അസാന്നിധ്യത്തിലാണ് നടക്കുന്നത്. ശക്തമായ പ്രകാശത്തില്‍ റോഡോപ്സിന്‍ മുഴുവനായും വിഘടിക്കപ്പെടും. ഇതിന്‍െറ ഫലമായി പ്രകാശംകുറഞ്ഞ മുറിയിലേക്ക് പ്രവേശിക്കുന്ന ആള്‍ക്ക് താല്‍ക്കാലിക അന്ധത ഉണ്ടാകുന്നു.
അയോഡോപ്സിന്‍
കോണ്‍കോശങ്ങളിലെ അയോഡോപ്സിന്‍ മൂന്ന് വ്യത്യസ്ത തരത്തില്‍ കാണുന്നു. ഇതനുസരിച്ച് മൂന്നുതരം കോണ്‍കോശങ്ങള്‍ ഉണ്ട്.
Erythrolabe ചുവപ്പ്
Chlorolabe പച്ച
cynolable നീല
ശക്തമായ പ്രകാശത്തില്‍ മാത്രമേ അയോഡോപ്സിന്‍ വിഘടിക്കുന്നുള്ളൂ. അയോഡോപ്സിന്‍െറ പുനര്‍നിര്‍മാണം വളരെ വേഗത്തില്‍ നടക്കും. ഏതെങ്കിലും ഒരുതരം കോണ്‍കോശങ്ങളുടെ ജന്മനാല്‍ ഉണ്ടാകുന്ന അഭാവം അതുമായി ബന്ധപ്പെട്ട നിറങ്ങളെ തിരിച്ചറിയുവാനുള്ള ശേഷി നഷ്ടപ്പെടുത്തും. ഇതാണ് വര്‍ണാന്ധത (colour blindness).
ദ്വിനേത്ര ദര്‍ശനം
രണ്ടു കണ്ണിലുമുള്ള പ്രതിബിംബങ്ങളും തലച്ചോറില്‍ വെച്ച് സമന്വയിച്ച് വസ്തുക്കളെ ഏക ദൃശ്യമായി കാണുന്നതാണ് ദ്വിനേത്ര ദര്‍ശനം.
ഗ്ളോക്കോമ (Glocoma)
കണ്ണിലെ അക്വിസ് ദ്രവത്തിന്‍െറ പുനരാഗിരണം നടക്കാതിരിക്കുന്നതുമൂലം കണ്ണിനുള്ളില്‍ അസാധാരണമായി മര്‍ദ്ദം അനുഭവപ്പെടുന്നു. ഇതിന്‍െറ ഫലമായി ലെന്‍സിന്‍െറ വക്രതയില്‍ വ്യത്യാസമുണ്ടാകുന്ന അവസ്ഥയാണ് മര്‍ദമാണ് ഗ്ളോക്കോമ.
ദീപങ്ങള്‍ക്ക് ചുറ്റും വര്‍ണവലയം കാണുക, രാത്രിയില്‍ കാഴ്ചക്കുറവ്, ഇരുട്ടാകുമ്പോള്‍ കണ്ണിനുചുറ്റും വേദന എന്നിവയാണ് ഗ്ളോക്കോമയുടെ ലക്ഷണങ്ങള്‍.
കണ്‍കുരു (sty)
ശുചിത്വമില്ലെങ്കില്‍ വരാനിടയുള്ള രോഗമാണ് കണ്‍കുരു. സ്റ്റെഫലോ കോക്കസ് എന്ന ബാക്ടീരിയയാണ് ഇതിനു കാരണം.
കോങ്കണ്ണ്
കണ്ണിലെ പേശികളുടെ സമന്വിതചലനം നഷ്ടമാകുന്നതുമൂലം ഉണ്ടാകുന്ന തകരാറാണ് കോങ്കണ്ണ്.

കടപ്പാട്: മാധ്യമം ദിനപത്രം 
Subscribe to കിളിചെപ്പ് by Email
Share:

മന്‍സൂര്‍ അലിഖാന്‍ പട്ടൗഡി


ഇടതുകണ്ണിനേക്കാള്‍ കാഴ്ചയുള്ള തന്റെ അകക്കണ്ണുകൊണ്ട് ഇന്ത്യന്‍ ക്രിക്കറ്റിനെ ലോക ക്രിക്കറ്റ് മൈതാനത്തില്‍ പ്രവേശിക്കാന്‍ വഴിയൊരുക്കിയ ടൈഗര്‍ യുഗത്തിന്റെ സ്രഷ്ടാവായ മന്‍സൂര്‍ അലിഖാന്‍ പട്ടൗഡി (Mansoor Ali Fhan Pataudi)ജീവിതത്തിന്റെ ക്രീസില്‍നിന്ന് യാത്രയായിട്ട് ഒരുവര്‍ഷം കടന്നുപോകുന്നു. 2011 സെപ്തംബര്‍ 22ന് കഥാവശേഷനായ ടൈഗര്‍ എന്നു വിളിപ്പേരുള്ള മന്‍സൂര്‍ അലിഖാന്‍ പട്ടൗഡി ഇന്ത്യന്‍ ക്രിക്കറ്റിന് ആദ്യമായി മാന്യതയുടെയുംഊര്‍ജസ്വലതയുടെയും പരിവേഷമേകിയ കളിക്കാരനും നായകനുമായിരുന്നു. അപകര്‍ഷതാബോധത്തിന്റെ ഇരുട്ടില്‍ തപ്പുകയായിരുന്ന ഇന്ത്യന്‍ ക്രിക്കറ്റിനെ ആത്മവിശ്വാസത്തിന്റെ വെള്ളിവെളിച്ചത്തിലേക്കു നയിക്കുകയും വൈഖരികള്‍ സൃഷ്ടിക്കുകയും നവീനമായ ആശയങ്ങള്‍ നല്‍കുകയും ചെയ്ത ഈ ജെന്റില്‍മാന്‍ ക്രിക്കറ്ററുടെ പേരിനോടു ചേര്‍ത്തുവയ്ക്കേണ്ട ടൈഗര്‍യുഗം നമ്മുടെ ക്രിക്കറ്റ് ചരിത്രത്തില്‍ എന്നും വേറിട്ടു നില്‍ക്കുകതന്നെ ചെയ്യും.

ഏകദിനവും ട്വന്റി-20 (Twenty - 20)എന്ന നാനോകളിയും ടിവി സംപ്രേഷണവും ഇല്ലാതിരുന്ന കാലത്ത് ടെസ്റ്റ് ക്രിക്കറ്റിന്റെ അഭിജാത ഭൂമികയില്‍ ഇന്ത്യ വില്‍ക്കുന്ന ക്രിക്കറ്റ് സ്വപ്നങ്ങള്‍ വിലകുറഞ്ഞ സാധനമാണെന്ന പരിഹാസം എതിരാളികള്‍ക്കുണ്ടായിരുന്നു. എന്നാല്‍ മികച്ച ബാറ്റ്സ്മാനെന്നും കല്‍പ്പനാവൈഭവമുള്ള നായകനെന്നും പരക്കെ അംഗീകാരം നേടിയ പട്ടൗഡി ചങ്കൂറ്റത്തോടെ നടത്തിയ പരീക്ഷണങ്ങളും പ്രൊഫഷണല്‍ സമീപനവും അതിലൂടെ വെട്ടിപ്പിടിച്ച വിജയങ്ങളും ഇന്ത്യന്‍ ക്രിക്കറ്റിനെക്കുറിച്ചുള്ള മുന്‍ധാരണകള്‍ തിരുത്തിക്കുറിക്കാന്‍ പര്യാപ്തമാക്കി. പട്ടൗഡി രാജവംശത്തിലെ എട്ടാം നവാബായിരുന്ന ഇഫ്തിഖര്‍ അലിഖാന്‍ പട്ടൗഡിയുടെയും ഭോപാലിലെ അവസാന ഭരണാധികാരിയായ നവാബിന്റെ രണ്ടാമത്തെ മകള്‍ സാജിദ സുല്‍ത്താന്റെയും മകനായി 1941 ജനുവരി അഞ്ചിന് ജനിച്ച മന്‍സൂര്‍ അലിഖാനും അച്ഛനെപ്പോലെ പഠിച്ചതും വളര്‍ന്നതും യുവക്രിക്കറ്ററായി അംഗീകാരം നേടിയതുമെല്ലാം ഇംഗ്ലണ്ടിലായിരുന്നു.

പട്ടൗഡിയുടെ പഠിപ്പുകഴിഞ്ഞ് അദ്ദേഹം നാട്ടിലെത്തുന്നത് കാത്തിരിക്കുമ്പോഴാണ് നടുക്കുന്ന ആ വാര്‍ത്ത എത്തിയത്. പട്ടൗഡിക്ക് കാറപകടത്തില്‍ ഗുരുതരമായി പരിക്കേറ്റു. അപകടത്തില്‍ വലതു കണ്ണിന്റെ കാഴ്ച പൂര്‍ണമായി നഷ്ടപ്പെട്ട നവാബിന് പിന്നീട് ക്രിക്കറ്റ് കളിക്കാന്‍ കഴിയുമെന്ന് ആരും കരുതിയതല്ല. പക്ഷേ ടൈഗര്‍ എന്ന പേരിനെ അന്വര്‍ഥമാക്കുംവിധം ആറുമാസം ആശുപത്രിയില്‍ കഴിഞ്ഞ ഇരുപതുകാരനായ പട്ടൗഡി കഠിന പരിശീലനത്തിലൂടെ തന്റെ ബാറ്റിങ് പാടവം വീണ്ടെടുത്തു. 1961 ഡിസംബര്‍ 13ന് ഡല്‍ഹി കോട്ലയില്‍ എംസിസിക്കെതിരെ അരങ്ങേറിയ പട്ടൗഡി 1962ല്‍ വെസ്റ്റിന്‍ഡീസില്‍ പര്യടനം നടത്തിയ ഇന്ത്യന്‍ ടീമിന്റെ ഉപനായകനായിരുന്നു. 1962 മാര്‍ച്ച് 16ന് നായകനായ നരി കോണ്‍ട്രാക്ടര്‍, ചാര്‍ലി ഗിഫ്ത്തിന്റെ ബംബറിനു മുമ്പില്‍ നിലംപതിച്ചപ്പോള്‍ പട്ടൗഡിക്ക് ക്യാപ്റ്റന്‍സി ഏറ്റെടുക്കേണ്ടിവന്നു. 21 വര്‍ഷവും രണ്ടു മാസവും 18 ദിവസവും പ്രായമുള്ളപ്പോള്‍ ഇന്ത്യയുടെ നായകപട്ടം ചൂടിയ പട്ടൗഡിക്ക് 2004 വരെ ലോകത്തിലെ ഏറ്റവും പ്രായംകുറഞ്ഞ ക്രിക്കറ്റ് ക്യാപ്റ്റനെന്ന ബഹുമതി ഉണ്ടായിരുന്നു. സെലക്ടര്‍മാര്‍ തന്നിലര്‍പ്പിച്ച വിശ്വാസം അദ്ദേഹം കാത്തു എന്ന്പിന്നീട് കാലം തെളിയിച്ചു.

പട്ടൗഡിയെ മാറ്റി അജിത്വഡേക്കറെ ക്യാപ്റ്റനാക്കിയ സംഭവം അന്ന് വലിയ വിവാദത്തിനു വഴിവച്ചു. ക്രിക്കറ്റ് ലോകം ഒരവസരത്തില്‍ വഡേക്കര്‍ അനുകൂലികളായും പട്ടൗഡി പക്ഷക്കാരായും തിരിഞ്ഞു. ഒരുപക്ഷേ ക്രിക്കറ്റിന്റെ കടിഞ്ഞാണ്‍ ഇടത്തരക്കാരന്റെ കൈകളിലേക്കു വരുന്ന ഒരു കാലഘട്ടത്തിന്റെ മാറ്റത്തെയാകാം അതു കുറിച്ചത്. സുനില്‍ ഗാവസ്കറെപ്പോലെ പിന്നീടു വന്നവര്‍ രാജപാരമ്പര്യമില്ലാത്തവരും ഇംഗ്ലണ്ടില്‍ പോയി പഠിക്കുകയോ കളിക്കുകയോ ചെയ്യാത്തവരുമാണല്ലോ. ഇന്ത്യക്ക് വിദേശത്ത് ആദ്യ ടെസ്റ്റ് പരമ്പര വിജയം 1967ല്‍ ന്യൂസിലന്‍ഡിനെതിരെ നേടിത്തന്ന മന്‍സൂര്‍ അലിഖാന്‍ പട്ടൗഡി താന്‍ കളിച്ച 46 ടെസ്റ്റുകളില്‍ 40ലും നായകനായിരുന്നു. ഒമ്പത് ടെസ്റ്റുകളില്‍ ഇന്ത്യന്‍ വിജയത്തിന്റെ അമരക്കാരനായ അദ്ദേഹം 83 ഇന്നിങ്സുകളായി ആറ് സെഞ്ചുറികളോടെ 2793 റണ്‍ നേടുകയും ചെയ്താണ് 1975ല്‍ ടെസ്റ്റ് വേദിയില്‍നിന്നു വിടപറഞ്ഞത്. ഇന്ത്യന്‍ ക്രിക്കറ്റ് ചരിത്രത്തിലെ സവിശേഷമായ ദശാസന്ധിയില്‍ മന്‍സൂര്‍ അലിഖാന്‍ പട്ടൗഡി എന്ന ധീരനായ നായകന്‍ ഇല്ലായിരുന്നെങ്കില്‍ സ്പിന്‍ത്രയത്തിന്റെ സുഗന്ധപൂരിതമായ ഏടുകള്‍ ഇത്ര ആധികാരികതയോടെ ഇന്ത്യക്ക് സ്ഥാപിക്കാന്‍ കഴിയുമായിരുന്നില്ല.

ആക്രമണാത്മകമായി ഓരോ കളിയെയും സമീപിക്കുന്ന പട്ടൗഡിയുടെ ഉള്‍ക്കാഴ്ചകള്‍ ടീം അംഗങ്ങള്‍ക്കും ഏറവും നല്ല പ്രകടനത്തിന് ഉള്‍പ്രേരകമായിരുന്നു. അവരുടെ മനസ്സിലും സമക്കളി ചിന്തകള്‍ കടന്നുവന്നിരുന്നില്ലെന്ന് ബിഷന്‍ബേദി സാക്ഷ്യപ്പെടുത്തുന്നു. ഗ്വാളിയര്‍ സ്യൂട്ടിങ്സിന്റെ പരസ്യത്തില്‍ പ്രത്യക്ഷപ്പെട്ടും കൊല്‍ക്കത്തയില്‍നിന്നുള്ള "സ്പോര്‍ട്സ് വേള്‍ഡ്" മാസികയുടെ പത്രാധിപരായും കണ്ട പട്ടൗഡി കുറഞ്ഞകാലം റേഡിയോ-ടിവി കമന്റേറ്ററുമായിരുന്നു. ഇടങ്കണ്ണുകൊണ്ട് ഇന്ത്യന്‍ ക്രിക്കറ്റിന്റെ മിഴിതുറന്ന പട്ടൗഡിയുടെ ക്രിക്കറ്റ് സപര്യക്കും ജീവിതയാത്രയ്ക്കും ഒരു ദുരന്തനാടകത്തിന്റെ ഇഴമുറുക്കവും വശ്യതയുമുണ്ട്. ഇംഗ്ലണ്ടിലും ഓസ്ട്രേലിയയിലും ടെസ്റ്റ്വേദിയില്‍ വീണുടഞ്ഞ ഇന്ത്യയുടെ വിജയവരങ്ങള്‍ വീണ്ടെടുക്കുക എന്നതാവണം അദ്ദേഹത്തിനുള്ള ഉചിതമായ സ്മരണാഞ്ജലി.

Subscribe to കിളിചെപ്പ് by Email
Share:

വരകളുടെ തമ്പുരാന്‍


രാജാക്കന്മാര്‍ക്കിടയിലെ ചിത്രകാരനും ചിത്രകാരന്മാര്‍ക്കിടയിലെ രാജാവുമായിരുന്നു രാജാരവിവര്‍മ. ചിത്രം വരയില്‍ യൂറോപ്യന്മാര്‍ക്ക് മാത്രമെ ആധിപത്യമുള്ളൂ എന്ന് പൊതുവെ ധാരണയുണ്ടായിരുന്ന കാലത്ത് സ്വന്തമായ ശൈലി സൃഷ്ടിച്ച് ചിത്രകലയെ ജനകീയവല്‍ക്കരിച്ച വ്യക്തിയാണ് അദ്ദേഹം. വരകളിലെ വേഷവിധാനത്തിലൂടെ അദ്ദേഹം പുതിയൊരു സാംസ്കാരിക വഴി സൃഷ്ടിക്കുകയായിരുന്നു. ഭാരതപുരാണങ്ങള്‍ക്കും കാവ്യങ്ങള്‍ക്കും കാഴ്ചാനുഭൂതി നല്‍കി എന്നതാണ് രാജാരവിവര്‍മയുടെ പ്രസക്തി. കൊട്ടാരക്കെട്ടിലാണ് ജീവിതം പിച്ചവച്ചതെങ്കിലും അദ്ദേഹം അതില്‍ കുടുങ്ങിക്കിടക്കാന്‍ ആഗ്രഹിച്ചില്ല. പുറംലോകത്തിന്റെ നവ്യസൗന്ദര്യം ആസ്വദിക്കാനായിരുന്നു ഇഷ്ടം. അവയൊക്കെ ചിത്രകലയിലേക്ക് ആവാഹിച്ചു. ഭാരതത്തിലാദ്യമായി എണ്ണച്ഛായ ചിത്രം വരയിലേക്ക് അദ്ദേഹം കടന്നു. വരകളിലൂടെ ത്രിമാന ആവിഷ്ക്കാരത്തിന് സാധ്യത കണ്ടെത്തി. ഹൈന്ദവ ദൈവങ്ങള്‍ക്ക് രൂപഭാവങ്ങളേകി. അദ്ദേഹത്തിന്റെ ഓരോ സൃഷ്ടിയും ലോകപ്രശസ്തങ്ങളായി. ഒപ്പം കീര്‍ത്തിയും അതിര്‍ത്തി കടന്നു. ലോകത്തിന്റെ പല ഭാഗങ്ങളിലും ചിത്രകലാപ്രദര്‍ശനം നടത്തി. ഇതിലൂടെ മലയാളത്തിന്റെ അഭിമാനവും കൊടിയേറി. അദ്ദേഹം വരയെ സ്വയംവരം ചെയ്യുകയായിരുന്നു.

കൊട്ടാരച്ചുമരില്‍ കോറിയിട്ട്....

തിരുവനന്തപുരം ജില്ലയിലെ (അന്ന് തിരുവിതാംകൂര്‍) കിളിമാനൂര്‍ കൊട്ടാരത്തിലായിരുന്നു രവിവര്‍മ്മയുടെ ജനം. ഏഴുമാവില്‍ നീലഭട്ടതിരിപ്പാടിന്റെയും ഉമാഅംബഭായി തമ്പുരാട്ടിയുടെയും മകനായി 1848 ഏപ്രില്‍ 29-നാണ് ജനം. പുരാണ കഥകളോടായിരുന്നു കുട്ടിക്കാലത്ത് താല്‍പര്യം. രണ്ടുമൂന്നു വയസ്സുള്ളപ്പോള്‍ തന്നെ കൊട്ടാരച്ചുമരുകളില്‍ രവിവര്‍മ കോറിയിട്ട ചിത്രങ്ങള്‍ കൊണ്ടു നിറഞ്ഞു. കരിക്കട്ടയില്‍ തുടങ്ങിയ രവിവര്‍മയുടെ ചിത്രം വരയിലെ കഴിവ്, അമ്മാവനും സ്വാതിതിരുനാള്‍ മഹാരാജാവിന്റെ ആസ്ഥാന ചിത്രകാരനുമായ രാജരാജവര്‍മയാണ് തിരിച്ചറിയുന്നത്. അദ്ദേഹത്തിന്റെ ശിഷ്യത്വത്തില്‍ തുടക്കത്തില്‍ രാജാരവിവര്‍മ ചിത്രകലാഭ്യാസം നടത്തി. തുടര്‍ന്ന് ചിത്രകലയിലെ ഉപരിപഠനത്തിനായി രാജാവ് തിരുവനന്തപുരത്ത് സൗകര്യമൊരുക്കി. കേരളത്തില്‍ അന്ന് ജലച്ഛായ ചിത്രങ്ങള്‍ക്കാണ് ഏറെ പ്രചാരമുണ്ടായിരുന്നത്. തഞ്ചാവൂര്‍, മധുര എന്നിവിടങ്ങളിലെ ചിത്രകാരന്മാരില്‍ നിന്ന് എണ്ണച്ഛായ ചിത്രരചനയില്‍ പ്രാവീണ്യം നേടി. അക്കാലത്ത് തിരുവനന്തപുരത്ത് എത്തിയ ഡച്ചുചിത്രകാരനായ തിയോഡര്‍ ജന്‍സനില്‍ നിന്ന് എണ്ണച്ഛായത്തില്‍ കൂടുതല്‍ സാങ്കേതികമായ അറിവ് നേടി. 1866-ല്‍ മാവേലിക്കര രാജകുടുംബത്തില്‍ നിന്ന് റാണിലക്ഷ്മിഭായി തമ്പുരാട്ടിയുടെ സഹോദരി പുരൂരുട്ടാതി തമ്പുരാട്ടിയെ വിവാഹം ചെയ്തു.

അംഗീകാരങ്ങളുടെ നിറവില്‍

1873-ല്‍ മദ്രാസില്‍ ചിത്രപ്രദര്‍ശനം നടത്തി. ഇതില്‍ "പിച്ചിപ്പൂ ചൂടിയ വനിത" എന്ന ചിത്രത്തിന് ഒന്നാം സ്ഥാനം ലഭിച്ചു. വിയന്നയില്‍ നടന്ന അന്താരാഷ്ട്ര പ്രദര്‍ശനത്തില്‍ ഈ ചിത്രത്തിന് തന്നെ ഒന്നാം സ്ഥാനം ലഭിച്ചു.1876-ല്‍ "ശകുന്തളയുടെ പ്രേമലേഖനം" എന്ന ചിത്രം പ്രശംസ പിടിച്ചുപറ്റി. രവിവര്‍മ എണ്ണച്ഛായത്തില്‍ വരച്ച ബക്കിങ്ങ്ഹാം പ്രഭുവിന്റെ ചിത്രം മദ്രാസ് ഗവണ്‍മെന്റ് ആസ്ഥാനത്ത് സ്ഥാപിച്ചതോടെ അദ്ദേഹത്തിന്റെ പ്രശസ്തി ഒന്നുകൂടി വര്‍ദ്ധിച്ചു. "ശകുന്തളയുടെ പ്രേമലേഖനം" എന്ന ചിത്രം കണ്ട സര്‍ മോണിയന്‍ വില്യംസ് തന്റെ അഭിജ്ഞാന ശാകുന്തളം എന്ന ഇംഗ്ലീഷ് പുസ്തകത്തിന്റെ മുഖചിത്രത്തിനായി ചോദിച്ചു. അങ്ങിനെ 28-ാം വയസ്സാകുമ്പോഴേക്കും രവിവര്‍മ ലോകപ്രശസ്തിയിലേക്ക് ഉയര്‍ന്നു. ഇതിനിടെ ബറോഡ രാജാവ് അദ്ദേഹത്തിന്റെ സ്വന്തം ചെലവില്‍ അവിടെ രവിവര്‍മയുടെ ചിത്രപ്രദര്‍ശനം നടത്തി. ആയിരങ്ങളാണ് പ്രദര്‍ശനം കാണാനെത്തിയത്. മാത്രമല്ല നിരവധി ചിത്രങ്ങള്‍ അവിടെ വിറ്റഴിഞ്ഞു.1904-ല്‍ ബ്രിട്ടീഷുകാര്‍ കേസരി ഹിന്ദ് (ഗമശമെൃശഒശിറ) എന്ന ബഹുമതി നല്‍കി രവിവര്‍മയെ ആദരിച്ചു. ഇതിനിടെ ബോംബെയില്‍ ചിത്രമുദ്രണ അച്ചുകൂടം ( ലിത്തോഗ്രാഫിക് പ്രസ്) സ്ഥാപിച്ചു. അങ്ങിനെ വ്യാപാരാടിസ്ഥാനത്തില്‍ തന്നെ തന്റെ ചിത്രങ്ങള്‍ മുദ്രണം ചെയ്യാന്‍ തുടങ്ങി. അങ്ങനെ ചിത്രങ്ങളുടെ ലക്ഷക്കണക്കിന് കോപ്പികള്‍ വില്‍ക്കപ്പെട്ടു. 1893-ല്‍ ഷിക്കോഗോയിലെ ലോകമേളയില്‍ രവിവര്‍മയുടെ ചിത്രപ്രദര്‍ശനം ഉണ്ടായിരുന്നു. മലബാര്‍ മനോഹരി, അച്ഛന്‍ വരുന്നു, വധു തുടങ്ങി പത്തു ചിത്രങ്ങളായിരുന്നു പ്രദര്‍ശനത്തിലേക്ക് അയച്ചത്. ഇതിലും ഒന്നാം സ്ഥാനം രവിവര്‍മയ്ക്കു തന്നെയായിരുന്നു. പുരാണങ്ങളെ അവലംബിച്ച് ചിത്രം വരക്കുന്നതില്‍ രവിവര്‍മ കാണിച്ച അസാമാന്യപാടവം പ്രത്യേകം ശ്രദ്ധേയമാണ്. ദമയന്തി, ശാകുന്തളം, ശ്രീകൃഷ്ണജനം, വിശ്വാമിത്രനും മേനകയും, രാധാമാധവം, അര്‍ജുനും സുഭദ്രയും, സൈരന്ധ്രിയും കീചകനും തുടങ്ങിയവ ഇതില്‍ പ്രധാനമാണ്. ശകുന്തള, സരസ്വതി, ലക്ഷ്മി തുടങ്ങിയ ചിത്രങ്ങളുടെ ലക്ഷക്കണക്കിന് കോപ്പികള്‍ വില്‍ക്കപ്പെട്ടു. ആധുനിക ഇന്ത്യന്‍ ചിത്രകല രവിവര്‍മയുടെ ചിത്രശൈലി തന്നെയാണ് പിന്തുടരുന്നത് എന്നു പറയാം. പ്രധാനമായും മഹാരാഷ്ട്രയിലെ സ്ത്രീകളുടെ വേഷമായിരുന്ന സാരി ഇന്ത്യയിലാകെ പ്രചരിച്ചതിനുപിന്നിലെ സ്വാധീനം രവിവര്‍മ ചിത്രമായിരുന്നുവെന്ന് കരുതുന്നവര്‍ ഏറെയാണ്. 1950-കളില്‍ കഥകളിയെ കൂടുതല്‍ മെച്ചപ്പെടുത്തുന്നതിന് കലാമണ്ഡലം രാമന്‍ കുട്ടിനായര്‍ പരശുരാമനുള്ള വേഷം പുതുക്കി നിശ്ചയിച്ചത് രവിവര്‍മ ചിത്രം മാനദണ്ഡമാക്കിയാണ്. 1960-കളില്‍ മോഹിനിയാട്ടത്തിലും പിന്നീട് ഭരതനാട്യത്തിലും വേഷവിധാനമാറ്റങ്ങള്‍ക്ക് രവിവര്‍മ ചിത്രം സ്വാധീനിക്കപ്പെട്ടു.

സമ്മാനമായി ആന

രവിവര്‍മയുടെ ആനക്കമ്പം ഏറെ പ്രശസ്തമായിരുന്നു. അതുമായി ബന്ധപ്പെട്ട നിരവധി കഥകളുണ്ട്. മൈസൂര്‍ രാജാവായിരുന്ന ചാമരാജേന്ദ്രന് ഏതാനും ചിത്രങ്ങള്‍ അദ്ദേഹം വരച്ച് സമര്‍പ്പിച്ചു. രാജാവിന് ചിത്രങ്ങള്‍ വളരെ ഇഷ്ടമായി. രവിവര്‍മയുടെ ആനക്കമ്പത്തെക്കുറിച്ച് അറിയാമായിരുന്ന രാജാവ് രണ്ട് ആനകളെ രവിവര്‍മയ്ക്ക് സമ്മാനമായി നല്‍കി. മദമിളകിയ ഒരു ആന യെ തിരുവിതാംകൂര്‍ രാജാവ് വില്‍ ക്കാന്‍ തീരുമാനിച്ചത്രെ. ഉടനെ രവിവര്‍മ അതിനെ ഏറ്റെടുത്തു. എന്നിട്ട് കിളിമാനൂരില്‍ കൊണ്ടുവന്നു സംരക്ഷിച്ചു. കവിത്വവും രവിവര്‍മ ഒരു കവികൂടിയായിരുന്നു. സംസ്കൃതഭാഷയിലായിരുന്നു അദ്ദേഹത്തിന്റെ കാവ്യരചന. മലയാളത്തിലും ചില രചനകള്‍ നടത്തി. ഒരു ഉത്തരേന്ത്യന്‍ യാത്രക്ക് ശേഷം അദ്ദേഹം നര്‍മദാനദിയെ വര്‍ണിച്ചെഴുതിയ കാവ്യമാണ് "മാനസയാത്ര" അവസാന നാളുകള്‍ രവിവര്‍മയുടെ എല്ലാകാര്യങ്ങളിലും ഇടപെട്ട അനുജന്‍ രാജരാജവര്‍മ 1904-ല്‍ മരിച്ചതോടെ രവിവര്‍മ മനസ്സുകൊണ്ടു വല്ലാതെ തളര്‍ന്നു. എന്നാലും ചിത്രരചനയില്‍ മുഴുകി എല്ലാ വിഷമങ്ങളും മാറ്റാന്‍ ശ്രമിച്ചു. രണ്ടു വര്‍ഷം പിന്നിട്ടപ്പോള്‍ രവിവര്‍മ പ്രമേഹരോഗബാധിതനായി. രോഗാവസ്ഥയെക്കുറിച്ച് വിദേശ പത്രങ്ങളില്‍പ്പോലും വാര്‍ത്തകള്‍ വന്നു. കിളിമാനൂരില്‍ വിദേശവാര്‍ത്ത ഏജന്‍സിയായ റോയിട്ടേഴ്സ് വരെ പ്രത്യേകമായി ക്യാമ്പ് ചെയ്ത് രോഗവിവരം പുറം ലോകത്തിന് നല്‍കി. 1906 ഒക്ടോബര്‍ രണ്ടിന് അദ്ദേഹം വരകളുടെ വലിയ ലോകത്തു നിന്ന് വിടവാങ്ങി. എന്നാല്‍ വര്‍ഷങ്ങള്‍ പിന്നിട്ടിട്ടും അദ്ദേഹത്തിന്റെ രചനകളെ ചിത്രകലയില്‍ വലിയ അറിവില്ലാത്തവര്‍ പോലും തിരിച്ചറിയുന്നു എന്നത് അദ്ദേഹത്തിന്റെ മഹത്വം തന്നെയാണ്.

Subscribe to കിളിചെപ്പ് by Email
Share:

നമ്മുടെ പരിസ്ഥിതി


മോണ്‍ട്രിയോള്‍ പെരുമാറ്റച്ചട്ടം
വിഷവസ്തുക്കളായ ക്ളോറോ ഫ്ളൂറോ കാര്‍ബണുകളും ഹാലോണുകളും ഓസോണിന് കേടു വരുത്തുന്ന പദാര്‍ഥങ്ങളാണെന്ന് ശാസ്ത്രലോകം കണ്ടെത്തിയിരിക്കുന്നു. ഇതിന്‍െറ ഫലമായി ഈ പദാര്‍ഥങ്ങളുടെ ഉല്‍പാദനവും ഉപഭോഗവും നിയന്ത്രിക്കുന്നതിന്  1989 ജനുവരി 29ന് ലോകരാഷ്ട്രങ്ങളും യൂറോപ്യന്‍ സാമ്പത്തിക സമൂഹവും അംഗീകരിച്ച മോണ്‍ട്രിയോള്‍ പെരുമാറ്റച്ചട്ടം നിലവില്‍വന്നു. ഓസോണ്‍ ശോഷണ പദാര്‍ഥങ്ങളുടെ 82 ശതമാനം ഉപയോഗിച്ച രാജ്യങ്ങള്‍ ആഗോള താപന ഭീഷണിയെത്തുടര്‍ന്നാണ് മോണ്‍ട്രിയോള്‍ പെരുമാറ്റച്ചട്ടം അംഗീകരിച്ചത്. ശേഷം എല്ലാ രാജ്യങ്ങളും ഈ പെരുമാറ്റച്ചട്ടം അംഗീകരിച്ചുതുടങ്ങി. ഇന്ത്യ 1992 സെപ്റ്റംബര്‍ 17നാണ് മോണ്‍ട്രിയോള്‍ പെരുമാറ്റച്ചട്ടം അംഗീകരിച്ചത്.

ക്ളോറോ ഫ്ളൂറോ കാര്‍ബണ്‍ (CFC)
ക്ളോറിന്‍, ഫ്ളൂറിന്‍, കാര്‍ബണ്‍ എന്നിവ ചേര്‍ന്ന പദാര്‍ഥമാണ് ഓസോണിന്‍െറ നാശത്തിന് കാരണമായ ക്ളോറോ ഫ്ളൂറോ കാര്‍ബണ്‍. ഫ്രീയോണ്‍ എന്നറിയപ്പെടുന്ന ഡൈക്ളോറോ ഡൈഫ്ളൂറോ മീഥേനാണ് സി.എഫ്.സിയിലെ പ്രധാനഘടകം. റഫ്രിജറേറ്റര്‍, എയര്‍കണ്ടീഷനര്‍ എന്നിവയില്‍ ശീതീകാരിയായും ചില എയറോസോള്‍ സ്പ്രേകളിലും കമ്പ്യൂട്ടര്‍ ക്ളീന്‍ ചെയ്യാനുള്ള ലായകങ്ങളിലുമെല്ലാം സി.എഫ്.സിയുണ്ട്. ഇവ ഉപയോഗിക്കുമ്പോള്‍ പുറത്തുവിടുന്ന സി.എഫ്.സി ഓസോണിന് കേടുവരുത്തുന്നു.

ഓസോണ്‍
ഓക്സിജന്‍െറ ഒരു രൂപമാണ് ഓസോണ്‍. മൂന്ന് ഓക്സിജന്‍ ആറ്റങ്ങള്‍ ചേര്‍ന്നാണ് ഓസോണ്‍ ഉണ്ടാകുന്നത്. സ്ട്രാറ്റോസ്ഫിയര്‍ എന്ന അന്തരീക്ഷപാളിയിലാണ് ഓസോണുള്ളത്. അന്തരീക്ഷവായുവിന്‍െറ 0.001 ശതമാനം മാത്രമാണ് ഓസോണ്‍ പാളിയുള്ളത്. ഈ ഓസോണാണ് സൂര്യപ്രകാശത്തിലെ മാരകമായ അള്‍ട്രാ വയലറ്റിനെ തടഞ്ഞുനിര്‍ത്തി ഭൂമിയിലെ ജീവജാലങ്ങളെ രക്ഷിക്കുന്നത്.

ഓസോണ്‍ വിള്ളല്‍
അടുത്തകാലത്ത് എടുത്ത ഭൂമിയുടെ ഉപഗ്രഹചിത്രങ്ങള്‍ ഓസോണ്‍ പാളിയില്‍ വിള്ളല്‍ വീണിരിക്കുന്നത് തെളിയിച്ചിട്ടുണ്ട്. അന്‍റാര്‍ട്ടിക്കാ മേഖലയിലെ ഓസോണ്‍ പാളിയില്‍ രണ്ട് കോടി 83 ലക്ഷം ചതുരശ്ര കിലോ മീറ്റര്‍ വിസ്തൃതിയില്‍ വിള്ളലുണ്ട്. കഴിഞ്ഞ ആറു വര്‍ഷമായി ഉത്തര ധ്രുവത്തിലും ഓസോണിന് വിള്ളല്‍ വീണതായി കണ്ടെത്തിയിട്ടുണ്ട്.

വൈദ്യുത കാന്തിക സ്പെക്ട്രം
വൈദ്യുത കാന്തിക വികിരണങ്ങളുടെ സമൂഹത്തെയാണ് വൈദ്യുത കാന്തിക സ്പെക്ട്രം എന്നു പറയുന്നത്. സൂര്യപ്രകാശത്തില്‍നിന്നു പുറപ്പെടുന്ന സ്പെക്ട്രത്തില്‍ ആറു വികിരണങ്ങളാണ് പ്രധാനമായും ഉള്ളത്. ഇതിലെ ഒരംഗമാണ് അര്‍ട്രാ വയലറ്റ് കിരണങ്ങള്‍. റേഡിയോ തരംഗം, മൈക്രോ വേവ്, ദൃശ്യപ്രകാശം, എക്സ് കിരണങ്ങള്‍, ഗാമാ കിരണങ്ങള്‍ എന്നിവയാണ് മറ്റ് അംഗങ്ങള്‍.

അള്‍ട്രാവയലറ്റിന്‍െറ സാന്നിധ്യം
അള്‍ട്രാവയലറ്റ് ഭൂമിയില്‍ പതിച്ചത് ഫോട്ടോഗ്രാഫിക്ക് പ്ളേറ്റില്‍നിന്ന് കണ്ടെത്താം. സൂര്യപ്രകാശത്തിന്‍െറ സാന്നിധ്യത്തില്‍ ഈ പ്ളേറ്റില്‍ രശ്മികള്‍ പതിച്ചുവെന്ന് ഉറപ്പിക്കാം.

അള്‍ട്രാവയലറ്റ് രോഗങ്ങള്‍
മാരകമായ രോഗങ്ങളാണ് ജന്തുക്കള്‍ക്കും സസ്യങ്ങള്‍ക്കും അള്‍ട്രാവയലറ്റ് രശ്മികള്‍ സമ്മാനിക്കുക. ഈ രശ്മികള്‍ തുടര്‍ച്ചയായി ഏല്‍ക്കുന്നതുമൂലം ചര്‍മാര്‍ബുദം ഉണ്ടാകുന്നു. കൂടാതെ ഈ രശ്മികള്‍ സൂക്ഷ്മജീവികള്‍ക്കും സസ്യങ്ങളിലെയും ജന്തുക്കളിലേയും മൃദുവായ കലകള്‍ക്കും കേടുപാടുണ്ടാക്കും.
തിമിരം, ജനിതക വൈകല്യം, ത്വഗ്രോഗം, പ്രതിരോധശക്തി കുറക്കല്‍, സാംക്രമിക രോഗങ്ങളുടെ വ്യാപനം, ഉല്‍പരിവര്‍ത്തനം എന്നിവ അള്‍ട്രാവയലറ്റ് മനുഷ്യനിലുണ്ടാക്കുന്ന രോഗങ്ങളാണ്. കാലാവസ്ഥാ മാറ്റം ഉണ്ടാകുമ്പോള്‍ മലമ്പനി, ജപ്പാന്‍ ജ്വരം, എലിപ്പനി എന്നിവയും വ്യാപിക്കുന്നു.

കടല്‍വിഭവം കുറയും
തുടര്‍ച്ചയായി അള്‍ട്രാവയലറ്റ് ഏല്‍ക്കുന്നത് കടല്‍ വിഭവങ്ങളെ ബാധിക്കും. മത്സ്യസമ്പത്ത് ഗണ്യമായി കുറയുകയും മത്സ്യങ്ങളുടെ പ്രജനനതോത് ഇല്ലാതാവുകയും ചെയ്യും. കടല്‍ജീവികള്‍ക്ക് ഏറെ ദോഷമുണ്ടാക്കുന്നുവെന്ന പഠനങ്ങള്‍ ഇതിനകം പുറത്തുവന്നിട്ടുണ്ട്.

പരിസ്ഥിതി നിയമങ്ങള്‍
ഓസോണ്‍ പാളിയുടെ രക്ഷക്കും ഒപ്പം നമ്മുടെ പരിസ്ഥിതിയുടെ രക്ഷക്കുമായി ചില നിയമങ്ങള്‍ നിലവില്‍ വന്നിട്ടുണ്ട്.
ഇത്തരം നിയമങ്ങള്‍ കര്‍ശനമായി നടപ്പാക്കുക വഴി പ്രകൃതിക്കുമേലുള്ള കടന്നുകയറ്റം ഒരു പരിധിവരെ അവസാനിപ്പിക്കാം.

ഓസോണ്‍ ഡിപ്ളെറ്റിങ് സബ്സ്റ്റന്‍സസ്
1986ലാണ് പരിസ്ഥിതി സംരക്ഷണ നിയമം നടപ്പില്‍വന്നത്. ഓസോണ്‍ പാളിയുടെ ക്ഷയത്തിന് കാരണമായ 95ഓളം മൂലകങ്ങളുടെ ഉല്‍പാദനം, ഉപഭോഗം, കയറ്റുമതി, ഇറക്കുമതി, വില്‍പന, വാങ്ങല്‍, ഉപയോഗം, നിക്ഷേപം എന്നിവയെല്ലാം ഈ നിയമം കര്‍ശനമായി നിരോധിക്കുന്നു. 1989ലെ മോണ്‍ട്രിയോള്‍ ഉടമ്പടിയുടെ പ്രധാന നിര്‍ദേശം എന്ന നിലയില്‍ 119 രാജ്യങ്ങളുമായി ഈ നിയമം ബന്ധപ്പെട്ടുകിടക്കുന്നു.

ഇന്ത്യന്‍ ഫോറസ്റ്റ് ആക്റ്റും (1927) വനസംരക്ഷണ നിയമവും (1980)
ജൈവ വൈവിധ്യങ്ങളുടെ കലവറയായ വനങ്ങളെ പൊതുസ്വത്ത് എന്നനിലയില്‍ സംരക്ഷിക്കുന്നതിനുവേണ്ടി നിലവില്‍വന്ന നിയമങ്ങളാണിവ. റിസര്‍വ് വനങ്ങളുടെ സംരക്ഷണം, വനവിഭവങ്ങളുടെ സംരക്ഷണം, കാടിന്‍െറ ഉപയോഗനിയന്ത്രണം തുടങ്ങിയവ ഈ നിയമത്തില്‍ പ്രതിപാദിച്ചിരിക്കുന്നു.

ജലനിയമം (1974)
ജലമലിനീകരണം തടയാനും ഇല്ലാതാക്കാനുമായി നിലവില്‍വന്ന നിയമമാണിത്. ഇതിന്‍െറ ഭാഗമായി കേന്ദ്ര-സംസ്ഥാനതലത്തില്‍ മലിനീകരണ നിയന്ത്രണബോര്‍ഡുകള്‍ നടപ്പാവുകയും അവ ജലമലിനീകരണം നിയന്ത്രിക്കാനുള്ള നടപടികള്‍ കൈക്കൊള്ളുകയും ചെയ്തു. മലിനീകരണത്തിനു പിന്നില്‍ പ്രവര്‍ത്തിക്കുന്നവര്‍ക്കെതിരെ കര്‍ശനമായ നടപടികള്‍ ഈ നിയമത്തില്‍ അനുശാസിക്കുന്നുണ്ട്.

കേരള ഭൂഗര്‍ഭ ജലനയം 2002
ഭൂഗര്‍ഭ അറയിലെ ജലസമ്പത്ത് സംരക്ഷിക്കുന്നതിനായി നിലവില്‍ വന്ന നിയമമാണിത്. അമിതമായ ഭൂജലചൂഷണം പലതരത്തിലുമുള്ള പാരിസ്ഥിതിക പ്രശ്നങ്ങള്‍ ഉണ്ടാക്കുന്നുവെന്ന കണ്ടെത്തലിനെത്തുടര്‍ന്നാണ് ഈ നിയമം നടപ്പിലായത്. ഈ നിയമം നടപ്പാക്കുന്നതിന് സര്‍ക്കാര്‍തലത്തില്‍ ഭൂജല അതോറിറ്റി പ്രവര്‍ത്തിക്കുന്നു. ഇതിന്‍െറ അധികാരങ്ങള്‍ താഴെ കൊടുക്കുന്നു.
* പൊതുകുടിവെള്ള സ്രോതസ്സുകള്‍ സംരക്ഷിക്കുക.
* ഭൂജല ഉപയോഗത്തിന്‍െറ നിയന്ത്രണത്തിനും ക്രമീകരണത്തിനും വേണ്ടി പ്രദേശങ്ങള്‍ വിജ്ഞാപനം ചെയ്യല്‍.
* വിജ്ഞാപനം ചെയ്യപ്പെട്ട പ്രദേശത്തെ കിണറുകളുടെ രജിസ്ട്രേഷന്‍.
* ഭൂജല ഉപഭോക്താവിന്‍െറ രജിസ്ട്രേഷന്‍.
* പെര്‍മിറ്റ്, സര്‍ട്ടിഫിക്കറ്റ്  റദ്ദാക്കല്‍.

വായു സംരക്ഷണ നിയമം  (1981)
ശുദ്ധവായു ശ്വസിക്കാനുള്ള പൗരന്‍െറ അവകാശത്തിന് സര്‍വവിധ സംരക്ഷണവും നല്‍കുന്നതിനുവേണ്ടിയാണ് ഈ നിയമം നിലവില്‍ വന്നത്. കേന്ദ്ര-സംസ്ഥാന മലിനീകരണ നിയന്ത്രണ ബോര്‍ഡുകള്‍ വായുമലിനീകരിക്കുന്നവര്‍ക്കെതിരെ ശക്തമായ നടപടികള്‍ എടുക്കാന്‍ നിര്‍ദേശിച്ചിട്ടുണ്ട്.

പരിസ്ഥിതിസംരക്ഷണ നിയമം 1986
മധ്യപ്രദേശിലെ ഭോപാലില്‍ യൂനിയന്‍ കാര്‍ബൈഡ് ഫാക്ടറിയില്‍നിന്ന് മീഥൈല്‍ ഐസോസയണേറ്റ് (MIC) എന്ന വിഷവാതകം 1984ല്‍ ചോര്‍ന്ന് ഉണ്ടായ മഹാദുരന്തത്തിന്‍െറ പശ്ചാത്തലത്തിലാണ് 1986ല്‍ പരിസ്ഥിതി സംരക്ഷണ നിയമം ഉണ്ടായത്. വായു മലിനീകരണം, ജലമലിനീകരണം, മണ്ണ് മലിനീകരണം എന്നിവയില്‍നിന്ന് ഭൂമിയിലെ ജീവജാലങ്ങളുടെ സംരക്ഷണം ഉറപ്പുവരുത്തുന്നതിനുമാണ് ഈ നിയമം  നിലവില്‍ വന്നത്. വായു, ജലം എന്നിവയുടെ ഗുണനിലവാരം പരിശോധിക്കുന്നതിനായി നിരവധി ലബോറട്ടറികളും, വ്യവസായ ശാലകള്‍ പ്രവര്‍ത്തിക്കാനും വര്‍ഷത്തില്‍ ലൈസന്‍സ് പുതുക്കുന്നതിനും മലിനീകരണ നിയന്ത്രണ ബോര്‍ഡും നിലവില്‍വന്നു.


ദേശീയ പരിസ്ഥിതി ട്രൈബ്യൂണല്‍ (1995)
1992 റിയോ ഡി ജനീറോയില്‍ നടന്ന അന്താരാഷ്ട്ര സമ്മേളനത്തിന്‍െറ തീരുമാനങ്ങളുടെ അടിസ്ഥാനത്തില്‍ രൂപപ്പെട്ട നിയമമാണിത്. പരിസ്ഥിതി സംബന്ധമായ പ്രശ്നങ്ങള്‍ മൂലം കഷ്ടനഷ്ടങ്ങള്‍ സംഭവിക്കുന്നവരെ കണ്ടെത്തി അര്‍ഹമായ നഷ്ടപരിഹാരം നല്‍കുക എന്നതാണ് ഇതിന്‍െറ ഉദ്ദേശ്യം. സുപ്രീംകോടതി / ഹൈകോടതി ജഡ്ജിമാരുടെ നേതൃത്വത്തില്‍ അഞ്ചുപേര്‍ അടങ്ങിയ ട്രൈബ്യൂണലാണ് ഇതിനായി പ്രവര്‍ത്തിക്കുന്നത്.

ജൈവവൈവിധ്യ നിയമം (2002)
1992 ജൂണ്‍ 5ന് റിയോ ഉച്ചകോടിയിലാണ് ജൈവവൈവിധ്യ ഉടമ്പടിക്ക് തീരുമാനമായത്. പ്രസ്തുത ഉടമ്പടിയുടെ ഒരു കക്ഷി എന്നതിനാല്‍ ഇന്ത്യന്‍ പാര്‍ലമെന്‍റ് 2003 ഫെബ്രുവരി അഞ്ചിന് ജൈവവൈവിധ്യ നിയമം  2002 പാസാക്കി. കേന്ദ്രത്തില്‍ ബയോ ഡൈവേഴ്സിറ്റി  അതോറിറ്റിയും സംസ്ഥാനത്തില്‍ ജൈവ വൈവിധ്യ ബോര്‍ഡും പ്രാദേശികതലത്തില്‍ ബയോ ഡൈവേഴ്സിറ്റി മാനേജ്മെന്‍റ് കമ്മിറ്റിയും രൂപവത്കരിക്കുന്നതിന് ജൈവ വൈവിധ്യ മാനേജ്മെന്‍റ് കമ്മിറ്റികള്‍ നിലവില്‍വന്നു.
ദേശീയ ബയോ ഡൈവേഴ്സിറ്റിക്ക് വിപുലമായ അധികാരങ്ങളാണുള്ളത്.
വിദേശ കമ്പനികള്‍ക്കും വിദേശ ഇന്ത്യക്കാര്‍ക്കും ജൈവ വൈവിധ്യവുമായി ബന്ധപ്പെട്ട് പ്രവര്‍ത്തനങ്ങള്‍ നടത്താന്‍ അനുവാദം നല്‍കുക.
ഗവേഷണ വിവരങ്ങള്‍ വിദേശികള്‍ക്കും സ്ഥാപനങ്ങള്‍ക്കും കൈമാറുന്നത് നിയന്ത്രിക്കുക.
ജൈവവൈവിധ്യങ്ങളുമായി ബന്ധപ്പെട്ട ബൗദ്ധിക സ്വത്തവകാശത്തിന് അപേക്ഷിക്കാനുള്ള അനുവാദം നല്‍കുക.
സംസ്ഥാനങ്ങളിലെ ജൈവവൈവിധ്യ പ്രാധാന്യമുള്ള കേന്ദ്രങ്ങളെയും ഹെറിറ്റേജ് കേന്ദ്രങ്ങളെയും ജൈവവൈവിധ്യ കേന്ദ്രങ്ങളാക്കി  പ്രഖ്യാപിക്കുക.
സംസ്ഥാനത്തെ ബയോ ഡൈവേഴ്സിറ്റി ബോര്‍ഡുകളുടെ ഏകോപനം നിര്‍വഹിക്കുക.

Subscribe to കിളിചെപ്പ് by Email
Share:

ബാപ്പുജി


ബാപ്പുജി നമുക്കെന്നും സജീവവും സ്നേ ഹനിര്‍ഭരവുമായ ചിന്തയാണ്. പാരതന്ത്ര്യത്തിന്റെ ചങ്ങലക്കെട്ടുകള്‍ക്കുള്ളില്‍നിന്ന് സ്വാതന്ത്ര്യത്തിന്റെ വെളിച്ചത്തിലേക്ക് പുതിയ സമരമുഖം നല്‍കി ഒരു ജനതയെ നയിച്ച മഹാന്‍. ലോകത്തെ മുഴുവന്‍ തന്നിലേക്ക് ആകര്‍ഷിക്കുംവിധം സത്യവും ധര്‍മ്മവും അഹിംസയും അടിസ്ഥാനമാക്കിയുള്ള കാഴ്ചപ്പാടുകള്‍; ഇന്നും എന്നും ലോകത്തിന് മാതൃക! അതുകൊണ്ടുതന്നെയാണ് ഗാന്ധിജിയെ ആദരിക്കുവാനും അറിയാനും ആധുനിക ലോകവും ശ്രമിക്കുന്നത്.

"ഞങ്ങളില്‍ ആരുടെയും പോലെയായിരുന്നില്ല ഗാന്ധിജിയുടെ വേഷം. വസ്ത്രധാരണം പ്രാകൃതം.ഞാന്‍ കോണ്‍ഗ്രസ് സമ്മേളനത്തില്‍ ആദ്യമായി പങ്കെടുക്കാന്‍ ചെന്നത് 1912ല്‍. ഞാനവിടെ കണ്ട നേതാക്കളില്‍നിന്ന് വ്യത്യസ്തനായിരുന്നു ഗാന്ധിജി. ലളിതമായ വസ്ത്രധാരണം, ലളിതമായ പെരുമാറ്റം, ലളിതമായ സംഭാഷണശൈലി, പറയുന്നത് ലളിതമായ കാര്യങ്ങള്‍... ഇടപെടുന്നവരുടെ മനസ്സറിഞ്ഞുകൊണ്ടുള്ള പെരുമാറ്റം. സംസാരിക്കുന്നത് തന്റെ നാട്ടുഭാഷയായ ഗുജറാത്തിയിലും ഹിന്ദിയിലും... ഒരു നാടന്‍ കൃഷിക്കാരനെപ്പോലെ ഗാന്ധിജി സംസാരിക്കുമ്പോള്‍ അവന്റെ മനസ്സാണ് ആ ശബ്ദത്തിലൂടെ കേള്‍ക്കുന്നത്." ഇത് രാഷ്ട്രപിതാവിനെപ്പറ്റി രാഷ്ട്രശില്‍പി ജവഹര്‍ലാല്‍ നെഹ്റു കുറിച്ചത്.

ഈ സമീപനം ദേശീയത ഇന്ത്യയിലെ സാധാരണക്കാരന്റെ ഹൃദയസ്പന്ദനമാക്കി. ഇടത്തരക്കാരുടെ ഇടപെടലുകളില്‍ പരിമിതപ്പെട്ട ദേശീയ സ്വാതന്ത്ര്യ പ്രസ്ഥാനത്തെ ജനസാമാന്യത്തിന്റെ വികാരവും വിചാരവുമാക്കി വളര്‍ത്തിയത് ഗാന്ധിജിയുടെ ഈ സമീപനത്തിന്റെ ഫലമായിരുന്നു. സത്യഗ്രഹം എന്ന സമരമാര്‍ഗത്തെ വിസ്മയകരമായി ഉപയോഗിക്കാന്‍ ഗാന്ധിജിക്ക് സാധിച്ചു. സത്യഗ്രഹ സമരമാര്‍ഗം ഫലപ്രദമായി ഉപയോഗിച്ചപ്പോള്‍ ലക്ഷക്കണക്കിന് സാധാരണക്കാരെ സ്വാതന്ത്ര്യസമരത്തിന്റെ പോരാളികളായി വളര്‍ത്താന്‍ കഴിഞ്ഞു. വികസന സങ്കല്‍പങ്ങള്‍ "ഏത് തരത്തിലുള്ള വികസനത്തിനും ആവശ്യമായ പദ്ധതികള്‍ ആസൂത്രണം ചെയ്യുമ്പോള്‍ ദരിദ്രരുടെയും ദുര്‍ബലരുടെയും മുഖമാണ് നമ്മുടെ മനസ്സില്‍ തെളിയേണ്ടത്. നിങ്ങളുടെ പദ്ധതികള്‍ അവര്‍ക്ക് എത്രമാത്രം പ്രയോജനപ്പെടുമെന്ന് ചിന്തിക്കുക. ഇതായിരിക്കണം വികസനത്തെ സംബന്ധിച്ച നിങ്ങളുടെ മാനദണ്ഡം." ഇങ്ങനെ അവശത അനുഭവിക്കുന്ന മനുഷ്യനെ അടിസ്ഥാനമാക്കിയുള്ള വികസന പ്രവര്‍ത്തനമാണ് ഗാന്ധിജി വിഭാവനം ചെയ്ത്. ഇന്ത്യയിലെ ഗ്രാമങ്ങളെയും ഗ്രാമീണരെയും ലക്ഷ്യമാക്കിയാവണം വികസനപരിപാടികള്‍ ആരംഭിക്കേണ്ടതെന്ന് അദ്ദേഹം ആഗ്രഹിച്ചു. അതിരുകവിഞ്ഞുള്ള വ്യവസായവല്‍ക്കരണത്തെ ഗാന്ധിജി അനുകൂലിച്ചിരുന്നില്ല. അതുമായി ബന്ധപ്പെട്ട് ഉണ്ടാകുന്ന പാരിസ്ഥിതിക പ്രശ്നങ്ങള്‍ അദ്ദേഹം മനസ്സിലാക്കുകയും ചൂണ്ടിക്കാട്ടുകയും ചെയ്തു. ഭൂമുഖത്തുള്ള പരിമിതവും നിയന്ത്രിതവുമായ വിഭവങ്ങള്‍ വിവേകപൂര്‍വ്വം ഉപയോഗിക്കാനാണ് മനുഷ്യന്‍ പഠിക്കേണ്ടതെന്ന് ഗാന്ധിജി വിശ്വസിച്ചു. "ഇന്ത്യക്ക് യഥാര്‍ത്ഥ സ്വാതന്ത്ര്യം ലഭിക്കണമെങ്കില്‍ അതുവഴി ലോകത്തിന് മുഴുവനായും ലഭിക്കണമെങ്കില്‍ നാം ഗ്രാമങ്ങളിലെ കുടിലുകളില്‍ താമസിക്കേണ്ടിവരും; പട്ടണങ്ങളിലെ രമ്യഹര്‍മ്മങ്ങളിലല്ല" എന്ന് ചൂണ്ടിക്കാട്ടുമ്പോള്‍ ഗാന്ധിജി ഗ്രാമങ്ങള്‍ക്ക് നല്‍കിയ പ്രാധാന്യം വ്യക്തമാവുമല്ലോ.

കര്‍മ്മ പരിപാടി

രാജ്യത്തെ സ്നേഹിക്കുന്ന ഓരോ പൗരനും പാലിക്കേണ്ട പതിനെട്ടിന കര്‍മ്മ പരിപാടി ഗാന്ധിജി രാഷ്ട്രത്തിന് നല്‍കിയിരുന്നു. മതസൗഹാര്‍ദ്ദം, അയിത്തോച്ചാടനം, മദ്യവര്‍ജനം, ഖാദി, ഗ്രാമവ്യവസായങ്ങള്‍, ഗ്രാമശുചീകരണം, അടിസ്ഥാന വിദ്യാഭ്യാസം, വയോജന വിദ്യാഭ്യാസം, സ്ത്രീ സുരക്ഷ, ആരോഗ്യ പ്രചരണം, പ്രാദേശിക ഭാഷാ സംരക്ഷണം, രാഷ്ട്രഭാഷയുടെ പ്രാധാന്യം, സാമ്പത്തിക സമത്വം, കൃഷിക്കാരുടെ പ്രാധാന്യം, തൊഴിലാളികള്‍, ആദിവാസികള്‍, കുഷ്ഠരോഗനിവാരണം, വിദ്യാര്‍ഥികള്‍ എന്നീ മേഖലകളില്‍ രാഷ്ട്രപുരോഗതിക്കുവേണ്ടി നടപ്പാക്കേണ്ട പ്രവര്‍ത്തനങ്ങളുടെ ദര്‍ശനമാണ് ഈ കര്‍മ്മപരിപാടിയിലൂടെ ഗാന്ധിജി വിശദീകരിച്ചത്. പുസ്തകങ്ങളില്‍ ബാപ്പു നാനൂറിലേറെ ജീവചരിത്ര പുസ്തകങ്ങള്‍ ഗാന്ധിജിയുടേതായി പ്രസിദ്ധീകരിച്ചിട്ടുണ്ട്. ഗാന്ധിജിയുടെ രചനകള്‍ സമാഹരിച്ച് കേന്ദ്രസര്‍ക്കാരിന്റെ പ്രസിദ്ധീകരണ വിഭാഗം നൂറ് വാല്യങ്ങളിലായി പുറത്തിറക്കിയ സമാഹാരം സമാനതകളില്ലാത്തതാണ്.

ജീവചരിത്രഗ്രന്ഥങ്ങളില്‍ ആധികാരികമായി കണക്കാക്കുന്നത് "മഹാത്മ ദ ലൈഫ് ഓഫ് മോഹന്‍ദാസ് കരംചന്ദ് ഗാന്ധി" എന്ന പുസ്തകമാണ്. എട്ടുവാല്യമായി പ്രസിദ്ധീകരിച്ച ഈ പുസ്തകം ഗാന്ധിജി മരിച്ചിട്ട് മൂന്ന് കൊല്ലങ്ങള്‍ക്കുശേഷം പുറത്തുവന്നു. ഡി ജി ടെന്‍ഡുല്‍ക്കറാണ് ഇതിന്റെ രചയിതാവ്. ഗാന്ധിജിയെപ്പറ്റി ഏറ്റവുമധികം വിവരങ്ങള്‍ പറഞ്ഞിട്ടുള്ള ഇതിന്റെ രചനാവേളയില്‍ അദ്ദേഹത്തിന്റെ സഹായവും ടെന്‍ഡുല്‍ക്കര്‍ക്ക് ലഭിച്ചിട്ടുണ്ട്. ഗാന്ധിജിയുടെ ജീവിതത്തെ കൃത്യമായി വരച്ചുകാട്ടിയ പുസ്തകങ്ങള്‍ രചിച്ചത് പ്യാരി ലാലാണ്. "മഹാത്മാഗാന്ധി-ദി ഏര്‍ലി ഫേസ് , ദ ലാസ്റ്റ് ഫേസ്്" എന്നിവയാണ് ഈ സമാഹാരങ്ങള്‍. മഹാദേവ് ദേശായിയുടെ "ഡേ ടു ഡെ വിത്ത് ഗാന്ധി" എന്ന പുസ്തകവും മികച്ചതാണ്. റിച്ചാര്‍ഡ് ആറ്റന്‍ബറോ "ഗാന്ധി" സിനിമയ്ക്ക് ആധാരമായി സ്വീകരിച്ചത് ലൂയിസ് ഫിഷര്‍ രചിച്ച "ദി ലൈഫ് ഓഫ് മഹാത്മഗാന്ധി" എന്ന ഗ്രന്ഥമാണ്. ഗാന്ധിജിയുടെ കേരള സന്ദര്‍ശനങ്ങള്‍ അഞ്ചുതവണ ഗാന്ധിജി കേരളത്തില്‍വന്നു.

1920 ആഗസ്ത് 18 നാണ് ആദ്യമായി എത്തിയത്. ദേശീയ പ്രക്ഷോഭത്തിന്റെ ഭാഗമായി ഖിലാഫത്ത് സമരത്തെ ശക്തിപ്പെടുത്തുകയായിരുന്നു ലക്ഷ്യം. കോഴിക്കോട് കടപ്പുറത്ത് തിങ്ങിനിറഞ്ഞ ജനക്കൂട്ടത്തെ അഭിസംബോധന ചെയ്ത് സംസാരിച്ചു. തുര്‍ക്കി സുല്‍ത്താനോട് ബ്രിട്ടീഷുകാര്‍ കാട്ടിയ അനീതിയും സ്വദേശി പ്രസ്ഥാനത്തിന്റെ ആവശ്യകതയും ജനങ്ങളെ ബോധ്യപ്പെടുത്തുന്നതായിരുന്നു പ്രസംഗം. വൈക്കം സത്യഗ്രഹത്തോട് അനുബന്ധിച്ചായിരുന്നു രണ്ടാമത്തെ സന്ദര്‍ശനം - 1925 മാര്‍ച്ച് 8 - 19. അയിത്തോച്ചാടനത്തിനും സഞ്ചാരസ്വാതന്ത്ര്യത്തിനുംവേണ്ടി നടന്ന സത്യഗ്രഹ പരിപാടികള്‍ക്ക് ഗാന്ധിജിയുടെ സാന്നിധ്യം ഊര്‍ജ്ജം പകര്‍ന്നു. ശ്രീനാരായണഗുരുവിനെ സന്ദര്‍ശിച്ച് സംഭാഷണം നടത്തിയത് ഈ വരവിലായിരുന്നു.

ഖാദി പ്രചരണം ലക്ഷ്യമാക്കി 1927 ഒക്ടോബര്‍ 9-25 വരെയായിരുന്നു മൂന്നാം തവണ ഗാന്ധിജി കേരളത്തില്‍ എത്തിയത്. ഗ്രാമവ്യവസായ സംഘം, ചര്‍ക്കാസംഘം എന്നിവയുടെ പ്രവര്‍ത്തനം വ്യാപിപ്പിക്കുന്നതിനുള്ള ദേശീയ പ്രചരണത്തിന്റെ ഭാഗമായിരുന്നു ഈ വരവ്. 1934 ജനുവരി 10 മുതല്‍ 22 വരെ നടന്ന നാലാം സന്ദര്‍ശനത്തിന്റെ ലക്ഷ്യം ഹരിജനോദ്ധാരണ പ്രവര്‍ത്തനങ്ങള്‍ക്ക് പണവും പിന്തുണയും ഉറപ്പിക്കുകയായിരുന്നു. വടകരയില്‍ ഇതുമായി ബന്ധപ്പെട്ടു നടന്ന യോഗത്തില്‍ കൗമുദി എന്ന പെണ്‍കുട്ടി തന്റെ സ്വര്‍ണ്ണാഭരണങ്ങള്‍ മുഴുവന്‍ ഊരി നല്‍കിയത് ഗാന്ധിജിയെ ഏറെ സ്പര്‍ശിച്ച സംഭവമായിരുന്നു. "ആഹ്ലാദകരമായ തീര്‍ത്ഥാടനം" എന്ന് ഗാന്ധിജിതന്നെ വിശേഷിപ്പിച്ച അഞ്ചാം സന്ദര്‍ശനം 1937 ജനുവരിയിലായിരുന്നു. തിരുവിതാംകൂറില്‍ ക്ഷേത്ര പ്രവേശന വിളംബരം നടന്നതിന്റെ ആഹ്ലാദം പങ്കിടാന്‍ എത്തിയ ഈ യാത്രയിലാണ് അയ്യങ്കാളിയെ കാണുന്നത്. 1921ല്‍ മലബാര്‍ കലാപം നടക്കുന്ന വേളയില്‍ അവിടം സന്ദര്‍ശിക്കാന്‍ ഗാന്ധിജി ആഗ്രഹിച്ചിരുന്നു. ഇതിനുവേണ്ടി പുറപ്പെട്ടെങ്കിലും ബ്രിട്ടീഷ് സര്‍ക്കാര്‍ അനുമതി നിഷേധിച്ചു.

Subscribe to കിളിചെപ്പ് by Email
Share:

ധീരദേശാഭിമാനികളുടെ ജീവിതരേഖകള്‍


മഹാത്മാഗാന്ധി (1869-1948)
അഹിംസാത്മക സമരങ്ങളിലൂടെ ബ്രിട്ടീഷ് സാമ്രാജ്യത്വത്തിന്‍െറ ആയുധശക്തിയോടേറ്റുമുട്ടി ഇന്ത്യന്‍ സ്വാതന്ത്ര്യസമരത്തിന് നേതൃത്വം നല്‍കിയ മോഹന്‍ദാസ് കരംചന്ദ് ഗാന്ധി 1869 ഒക്ടോബര്‍ രണ്ടിന് ഗുജറാത്തിലെ പോര്‍ബന്തറില്‍ ജനിച്ചു. പിതാവ് കരംചന്ദ് ഗാന്ധി. മാതാവ് പുത്ത്ലീഭായ്. തന്‍െറ വിദേശ വിദ്യാഭ്യാസത്തിനുശേഷം 1915ല്‍ ഇന്ത്യയില്‍ തിരിച്ചെത്തി ഇന്ത്യന്‍ ദേശീയ പ്രസ്ഥാനത്തില്‍ അംഗമായി. അതുവരെ കേട്ടുകേള്‍വിയില്ലാത്ത അഹിംസ, സത്യഗ്രഹം എന്നീ സമരമുറകളുമായിട്ടായിരുന്നു ഇന്ത്യന്‍ സ്വാതന്ത്ര്യസമരരംഗത്തേക്ക് പ്രവേശിച്ചത്. 1917ല്‍ ബിഹാറിലെ ചമ്പാരനില്‍ ഗാന്ധിജി ഇന്ത്യയിലെ തന്‍െറ ആദ്യ സത്യഗ്രഹം നടത്തി. ഇന്ത്യന്‍ ജനതക്കൊപ്പം ബ്രിട്ടീഷുകാര്‍പോലും ബഹുമാനിച്ച നേതാവായിരുന്നു ഗാന്ധിജി. ഹരിജനോദ്ധാരണം, ഹിന്ദി പ്രചാരണം, അടിസ്ഥാന വിദ്യാഭ്യാസ നയം, നിസ്സഹകരണ പ്രസ്ഥാനം, സിവില്‍ ആജ്ഞാലംഘന പ്രസ്ഥാനം, ക്വിറ്റ് ഇന്ത്യാ സമരം എന്നീ ബഹുമുഖ സമരമുറകള്‍ക്ക് മുന്‍നിരയില്‍നിന്ന് നേതൃത്വം നല്‍കിയത് ഗാന്ധിജിയായിരുന്നു. ക്വിറ്റ് ഇന്ത്യാ സമരത്തില്‍ ഗാന്ധിജിയുടെ ‘പ്രവര്‍ത്തിക്കുക അല്ലെങ്കില്‍ മരിക്കുക’ എന്ന മുദ്രാവാക്യം ലോകപ്രസിദ്ധമാണ്. മതസഹിഷ്ണുത പുലര്‍ത്തുന്ന രാമരാജ്യമായിരുന്നു ഗാന്ധിജിയുടെ സ്വപ്നം. 1948 ജനുവരി 30ന് നാഥുറാം വിനായക് ഗോദ്സെ ആ മഹാത്മാവിനെ വെടിവെച്ചുകൊന്നു.  രാഷ്ട്ര പിതാവിന്‍െറ ചരമദിനമായ ജനുവരി 30 നാം രക്തസാക്ഷിത്വദിനമായി ആചരിക്കുന്നു.  ‘എന്‍െറ സത്യാന്വേഷണ പരീക്ഷണങ്ങള്‍’ ഗാന്ധിജിയുടെ ആത്മകഥയാണ്. ഇന്ത്യന്‍ ജനതയെ മുഴുവന്‍ ഒരു കുടക്കീഴില്‍, ഒരു ലക്ഷ്യത്തിനുവേണ്ടി അണിനിരത്താന്‍ ഗാന്ധിജിക്ക് കഴിഞ്ഞു.
1947 ആഗസ്റ്റ് 15ലെ സ്വാതന്ത്ര്യ ദിനാഘോഷങ്ങളിലൊന്നും മഹാത്മാഗാന്ധി പങ്കെടുത്തിരുന്നില്ല. ഹിന്ദു-മുസ്ലിം കലാപം കൊണ്ട് കലങ്ങിമറിഞ്ഞുകിടക്കുന്ന കല്‍ക്കത്തയില്‍ സമാധാന സന്ദേശവുമായി പ്രാര്‍ഥനാ യോഗങ്ങളില്‍ സംബന്ധിക്കുകയാണുണ്ടായത്. ഇന്ത്യന്‍ സ്വാതന്ത്ര്യസമര ചരിത്രത്തിന്‍െറ ഒരു കാലഘട്ടം ‘ഗാന്ധിയുഗം’ എന്ന പേരില്‍ പില്‍ക്കാലത്ത് അറിയപ്പെട്ടു. ഗാന്ധിജിയുടെ അടിസ്ഥാന വിദ്യാഭ്യാസ സങ്കല്‍പം ഏറെ പ്രസിദ്ധമാണ്.

ജവഹര്‍ലാല്‍ നെഹ്റു(1889-1964)
ഇന്ത്യയുടെ പ്രഥമ പ്രധാനമന്ത്രിയും ഇന്ത്യന്‍ സ്വാതന്ത്ര്യസമരത്തിലെ പ്രമുഖനായകനും ലോകപ്രശസ്ത ഗ്രന്ഥകാരനുമായ ജവഹര്‍ലാല്‍ നെഹ്റു 1989 നവംബര്‍ 14ന് ജനിച്ചു. ഹാരോവിലും കേംബ്രിഡ്ജിലും വിദ്യാഭ്യാസം. ബാരിസ്റ്റര്‍ ബിരുദം നേടി കുറച്ചുകാലം വക്കീലായി പ്രാക്ടീസ് ചെയ്തു. 1915ല്‍ പൊതുരംഗത്ത് സജീവമായി പ്രത്യക്ഷപ്പെട്ട നെഹ്റു 1917ല്‍ ഗാന്ധിജിയുടെ സത്യഗ്രഹസഭയില്‍ അംഗമായി.
1929ലെ ലാഹോര്‍ സമ്മേളനത്തില്‍ അധ്യക്ഷത വഹിച്ച് ‘പൂര്‍ണ സ്വരാജ്’ എന്ന പ്രഖ്യാപനം നടത്തി. 1946ല്‍ നിലവില്‍ വന്ന ഇടക്കാല സര്‍ക്കാറിന്‍െറ തലവനായിരുന്നു നെഹ്റു. 1947ല്‍ ആദ്യ ഇന്ത്യന്‍ പ്രധാനമന്ത്രിയായി. സോഷ്യലിസം രാജ്യത്തിന്‍െറ നയമായി പ്രഖ്യാപിച്ചു. ഇന്ത്യയുടെ രാഷ്ട്രശില്‍പി എന്നറിയപ്പെടുന്ന ജവഹര്‍ലാല്‍ നെഹ്റു 1964 മേയ് 27ന് നിര്യാതനായി.

മൗലാനാ അബുല്‍ കലാം ആസാദ് (1888-1958)
അബുല്‍ കലാം മുഹ്യുദ്ദീന്‍ അഹ്മദ് എന്ന അബുല്‍കലാം ആസാദ് 1888 നവംബര്‍ 11ന് ജനിച്ചു. പേരിലെ ആസാദ് എന്ന വാക്കിന്‍െറ അര്‍ഥം സ്വതന്ത്രന്‍ എന്നാണ്. അത് അദ്ദേഹം തൂലികാനാമമായി സ്വീകരിച്ചതാണ്. സ്വത്രന്ത ഇന്ത്യയുടെ ആദ്യത്തെ വിദ്യാഭ്യാസ മന്ത്രിയായ മൗലാന ആസാദ് പത്രപ്രവര്‍ത്തകന്‍, ഗ്രന്ഥകാരന്‍, പണ്ഡിതന്‍ എന്നീ നിലകളില്‍ പ്രശസ്തനാണ്. ബംഗാള്‍ വിഭജനത്തിനെതിരെ പ്രവര്‍ത്തിച്ച് ദേശീയ പ്രസ്ഥാനത്തിലേക്ക് പ്രവേശിച്ചു. 1916ല്‍ ആസാദിനെ ബ്രിട്ടീഷ് സര്‍ക്കാര്‍ ബംഗാളില്‍നിന്ന് നാടുകടത്തി. 1920ല്‍ ജനുവരിയില്‍ ഗാന്ധിജിയുമായി ചേര്‍ന്ന് നിസ്സഹകരണ പ്രസ്ഥാനത്തില്‍ പങ്കാളിയായി. 1921ല്‍ ജയിലിലായി. 1923ല്‍ ഇന്ത്യന്‍ നാഷനല്‍ കോണ്‍ഗ്രസിന്‍െറ അധ്യക്ഷനായി. 1945വരെ പലതവണ അറസ്റ്റ് ചെയ്യപ്പെട്ടു. 1944ല്‍ ഭാര്യയുടെ മൃതദേഹം കാണാന്‍പോലും ബ്രിട്ടീഷ് സര്‍ക്കാര്‍ അനുവദിച്ചില്ല. ഹിന്ദു-മുസ്ലിം ഐക്യത്തിനുവേണ്ടി ജീവിതത്തിലുടനീളം പ്രചാരണം നടത്തിയ വ്യക്തിയായ ആസാദിനെ ‘ഒരു യുവാവിന്‍െറ ചുമലില്‍ വൃദ്ധന്‍െറ തല’ എന്നാണ് പണ്ഡിതര്‍ പ്രശംസിച്ചത്. സ്വാത്രന്ത്യാനന്തര ഇന്ത്യയിലെ നെഹ്റു മന്ത്രിസഭയില്‍ വിദ്യാഭ്യാസം, ശാസ്ത്ര ഗവേഷണം എന്നീ വകുപ്പുകളുടെ മന്ത്രി.  ‘ഇന്ത്യ വിന്‍സ് ഫ്രീഡം’ അദ്ദേഹത്തിന്‍െറ ആത്മകഥയാണ്. 1921ല്‍ ‘അല്‍ ഹിലാല്‍’  എന്ന ഉര്‍ദു വാരിക കല്‍ക്കത്തയില്‍ ആരംഭിച്ചു.  1940-46 കാലത്ത് കോണ്‍ഗ്രസ് പ്രസിഡന്‍റ് ആയിരുന്നു. 1958 ഫെബ്രുവരി 22ന് നിര്യാതനായി.

ലോകമാന്യ ബാലഗംഗാധര തിലകന്‍ (1856- 1920)
മഹാരാഷ്ട്രയിലെ രത്നഗിരിയില്‍ 1856 ജൂലൈ 23നാണ് ബാലഗംഗാധര തിലകന്‍ ജനിച്ചത്. ‘സ്വാതന്ത്ര്യം’ എന്‍െറ ജന്മാവകാശമാണ്, ഞാനത് നേടുകതന്നെ ചെയ്യു‘മെന്ന് പ്രഖ്യാപിച്ച തിലകന്‍ കോണ്‍ഗ്രസിലെ തീവ്രവാദികളുടെ നേതാവായിരുന്നു. ഗണിതശാസ്ത്രത്തിലും സംസ്കൃതത്തിലും പാണ്ഡിത്യം നേടി. വിധവാവിവാഹം, അയിത്തോച്ചാടനം എന്നിവക്ക് നേതൃത്വം നല്‍കി. മറാത്തി ഭാഷയില്‍ ആരംഭിച്ച കേസരി പത്രത്തില്‍ ബ്രിട്ടീഷുകാരെ വിമര്‍ശിച്ചതിന് 1895ല്‍ അറസ്റ്റിലായി. ജനങ്ങള്‍ ‘ലോകമാന്യന്‍’ എന്ന് വിളിച്ച അദ്ദേഹം 1908 ജൂണ്‍ 24ന് അറസ്റ്റിലായി ബര്‍മയിലേക്ക് നാടുകടത്തപ്പെട്ടു. ഹോം റൂള്‍ പ്രസ്ഥാനത്തിന് നേതൃത്വം നല്‍കിയ അദ്ദേഹം 1920 ആഗസ്റ്റ് ഒന്നിന് അന്തരിച്ചു.

വിനോബ ഭാവേ (1895-1982)
സര്‍വോദയ നേതാവ്. 1916ല്‍ മെട്രിക്കുലേഷന്‍ സര്‍ട്ടിഫിക്കറ്റ് കത്തിച്ചുകളഞ്ഞ് സ്വാതന്ത്ര്യസമരത്തിലിറങ്ങി.
1923ല്‍ പതാക സത്യഗ്രഹത്തില്‍ പങ്കെടുത്ത് ജയില്‍വാസം വരിച്ചു. 1942ല്‍ ക്വിറ്റ് ഇന്ത്യാ സമരത്തില്‍ പങ്കെടുത്തു. 1951 ഏപ്രില്‍ 18ന് ഭൂദാന പ്രസ്ഥാനം രൂപവത്കരിച്ചു.

ക്യാപ്റ്റന്‍ ലക്ഷ്മി (1914-2012)
നേതാജി സുഭാഷ് ചന്ദ്രബോസ് ആരംഭിച്ച ഇന്ത്യന്‍ നാഷനല്‍ ആര്‍മി (ഐ.എന്‍.എ)യുടെ വനിതാ സൈനിക ഘടകത്തിന്‍െറ നേതാവായിരുന്നു ക്യാപ്റ്റന്‍ ലക്ഷ്മി. 1914ല്‍ ജനിച്ച ഇവര്‍ വൈദ്യശാസ്ത്രത്തില്‍ ബിരുദം നേടിയശേഷം സ്വാതന്ത്ര്യസമരപ്രസ്ഥാനത്തില്‍ ചേര്‍ന്നു. ബര്‍മയില്‍വെച്ച് ബ്രിട്ടീഷ് സൈന്യത്തിന്‍െറ മുന്നേറ്റം തടയാന്‍ ക്യാപ്റ്റന്‍ ലക്ഷ്മിയുടെ നേതൃത്വത്തിലുള്ള സേനക്ക് കഴിഞ്ഞു. 2012 ജൂലൈ 23ന് നിര്യാതയായി.

വക്കം ഖാദര്‍ (1917-1943)
1917ന് മേയ് 25ന് തിരുവനന്തപുരം ജില്ലയിലെ വക്കത്ത് ജനിച്ച ഇദ്ദേഹം വിദ്യാര്‍ഥിയായിരിക്കുമ്പോള്‍ തന്നെ സ്വാതന്ത്ര്യസമരരംഗത്തെത്തി. ജോലിതേടി മലയായിലെത്തിയ ഖാദര്‍ സുഭാഷ് ചന്ദ്രബോസിന്‍െറ സമരങ്ങളില്‍ ആകൃഷ്ടനായി ഐ.എന്‍.എയില്‍ ചേര്‍ന്നു. ബ്രിട്ടീഷ് ഭരണത്തിനെതിരെ ഒളിപ്പോര് നയിക്കാന്‍ നിയോഗിച്ച സംഘത്തില്‍ ഖാദറും ഉണ്ടായിരുന്നു. ബ്രിട്ടീഷ് ഭരണം അട്ടിമറിക്കാന്‍ ഗൂഢാലോചന നടത്തി എന്ന കുറ്റം ചുമത്തി മദ്രാസില്‍ 1943 സെപ്റ്റംബര്‍ 10ന് വക്കം ഖാദറെ തൂക്കിക്കൊന്നു.

സര്‍ദാര്‍ വല്ലഭായ് പട്ടേല്‍ (1875-1950)
ഇന്ത്യയുടെ ‘ഉരുക്കുമനുഷ്യന്‍’ എന്നറിയപ്പെടുന്ന സര്‍ദാര്‍ വല്ലഭായ് പട്ടേല്‍ 1875 ഒക്ടോബര്‍ 31ന് ഗുജറാത്തില്‍ ജനിച്ചു. സ്വാതന്ത്ര്യസമരത്തിലെ അതുല്യ പോരാളിയായിരുന്നു വല്ലഭായ് പട്ടേല്‍. ബര്‍ദോളിയില്‍ കര്‍ഷകര്‍ നടത്തിയ നികുതി നിഷേധസമരത്തിന്‍െറ നായകനായ പട്ടേലിന്‍െറ സമരപാടവവും ധൈര്യവും നേതൃത്വശേഷിയും തിരിച്ചറിഞ്ഞ മഹാത്മാഗാന്ധിയാണ് ‘സര്‍ദാര്‍’ എന്ന പദവി പട്ടേലിന് നല്‍കിയത്. 1918ല്‍ ഗുജറാത്തില്‍ ഖൈരാ സത്യഗ്രഹം നയിച്ചു. 1946ലെ ഇടക്കാല ഗവണ്‍മെന്‍റില്‍ പട്ടേല്‍ ആഭ്യന്തര മന്ത്രിയായി നിയമിതനായി. അഞ്ഞൂറിലേറെ നാട്ടുരാജ്യങ്ങളെ ഇന്ത്യന്‍ യൂനിയനില്‍ ചേര്‍ക്കുന്നതിന് നേതൃത്വം നല്‍കിയ പട്ടേലിന്‍െറ രാജ്യതന്ത്രജ്ഞത കൊച്ചു കൊച്ചു നാട്ടുരാജ്യങ്ങളെ ഇന്ത്യന്‍ യൂനിയനില്‍ പങ്കുചേര്‍ക്കുന്നതില്‍ നിര്‍ണായക പങ്കുവഹിച്ചു. ഹൈദരാബാദിനെ സൈനിക നടപടിയിലൂടെ ഇന്ത്യന്‍ യൂനിയനില്‍ ചേര്‍ക്കാന്‍ ‘ഓപറേഷന്‍ പോളോ’ക്ക് ഉത്തരവിട്ടു. ഭരണഘടന തയാറാക്കാന്‍ രൂപവത്കൃതമായ വ്യവസ്ഥാപക സമിതി, മൗലികാവകാശ കമ്മിറ്റി, ന്യൂനപക്ഷ കമ്മിറ്റി തുടങ്ങി പ്രധാനപ്പെട്ട കമ്മിറ്റികളില്‍ അംഗമായി.
ഇന്ത്യന്‍ അഡ്മിനിസ്ട്രേറ്റിവ് സര്‍വീസിന്‍െറയും ഇന്ത്യന്‍ പൊലീസ് സര്‍വിസിന്‍െറയും ശില്‍പി  എന്നറിയപ്പെടുന്നത് പട്ടേലാണ്. ഹൈദരാബാദിലെ നാഷനല്‍ പൊലീസ് അക്കാദമി അദ്ദേഹത്തിന്‍െറ പേരില്‍ നാമകരണം ചെയ്യപ്പെട്ടു. മഹാത്മാഗാന്ധിയെ ഒടുവില്‍ സന്ദര്‍ശിച്ച നേതാവ് പട്ടേലാണ്.
1950 ഡിസംബര്‍ 15ന് നിര്യാതനായി. പദവിയിലിരിക്കെ അന്തരിച്ച ഉപപ്രധാനമന്ത്രിയാണ് പട്ടേല്‍.

ഗോപാലകൃഷ്ണ ഗോഖലെ (1866-1915)
മഹാരാഷ്ട്രയിലെ രത്നഗരി ജില്ലയില്‍ ജില്ലയില്‍ 1866 മെയ് ഒമ്പതിന് ജനിച്ചു. പ്രഭാഷകന്‍, എഴുത്തുകാരന്‍, അധ്യാപകന്‍ എന്നീ നിലകളില്‍ പ്രശസ്തനായ ഗോഖലെയാണ് മഹാത്മാഗാന്ധിയെ സ്വാതന്ത്ര്യസമര പ്രസ്ഥാനത്തിലേക്ക് ആകര്‍ഷിച്ചത്. സമാധാനപരമായ സമരമാര്‍ഗങ്ങളിലൂടെ സ്വാതന്ത്ര്യം നേടിയെടുക്കണമെന്നു വിശ്വസിച്ച ‘മിതവാദി’ വിഭാഗത്തിന്‍െറ നേതാവായിരുന്ന അദ്ദേഹത്തെ ഗാന്ധി തന്‍െറ രാഷ്ട്രീയ ഗുരുവായി കണക്കാക്കി. നാഷനല്‍ കോണ്‍ഗ്രസിന്‍െറ സെക്രട്ടറിയായി. 1905ല്‍ സര്‍വന്‍റ്സ് ഓഫ് ഇന്ത്യ സൊസൈറ്റി സ്ഥാപിച്ചു. 1915 ഫെബ്രുവരി 19ന് നിര്യാതനായി.

സി. രാജഗോപാലാചാരി (1878-1972)
സ്വതന്ത്ര ഇന്ത്യയുടെ ആദ്യ ഗവര്‍ണര്‍ ജനറലായ വി. രാജഗോപാലാചാരി 1878 ഡിസംബര്‍ എട്ടിന് ജനിച്ചു. രാഷ്ട്ര തന്ത്രജ്ഞന്‍, ഗ്രന്ഥകാരന്‍ എന്നീ നിലകളില്‍ പ്രശസ്തനാണ്. വക്കീല്‍ ജോലി ഉപേക്ഷിച്ച് നിസ്സഹകരണ പ്രസ്ഥാനത്തില്‍ സജീവമായ അദ്ദേഹം ഗാന്ധിജി ജയിലിലായപ്പോള്‍ യങ് ഇന്ത്യ പത്രാധിപ സ്ഥാനം ഏറ്റെടുത്തു. 1921ല്‍ കോണ്‍ഗ്രസ് സെക്രട്ടറിയായി. ഗാന്ധിജിയുടെ വിശ്വസ്തനായ അനുയായി ആയിരുന്നെങ്കിലും ക്വിറ്റ് ഇന്ത്യാ  സമരത്തോട് യോജിച്ചില്ല. 1972 ഡിസംബര്‍ 25ന് നിര്യാതനായി.

ഖാന്‍ അബ്ദുല്‍ ഗഫാര്‍ ഖാന്‍ (1890-1988)
അതിര്‍ത്തി ഗാന്ധി എന്ന പേരില്‍  പ്രസിദ്ധനായ ഗഫാര്‍ ഖാന്‍ 1890ല്‍ ജനിച്ചു. ഇദ്ദേഹം ഗാന്ധിജിയുടെ അടുത്ത ശിഷ്യനായിരുന്നു. രാജ്യത്തിന്‍െറ സ്വാതന്ത്ര്യത്തിനുവേണ്ടി  ജീവിതം മാറ്റിവെച്ചു. ഗ്രാമവാസികളിലെ സാധുകുട്ടികളുടെ ജീവിതത്തിനുവേണ്ടി ‘ദാറുല്‍ ഉലും’ സ്ഥാപിച്ചു. സ്നേഹം, അഹിംസ എന്നിവ പ്രചരിപ്പിക്കാന്‍ ‘ഖുദായ് ഖിദ്മത്ഗാര്‍’ എന്ന സംഘടന ഉണ്ടാക്കി.

ദാദാഭായി നവറോജി (1825-1917)
ബ്രിട്ടീഷ് പാര്‍ലമെന്‍റില്‍ അംഗമായ ആദ്യ ഇന്ത്യക്കാരനായ ദാദാഭായി നവറോജി 1825 സെപ്റ്റംബര്‍ നാലിന് മുംബൈയില്‍ ജനിച്ചു.  ഇന്ത്യന്‍ നാഷനല്‍ കോണ്‍ഗ്രസിന്‍െറ സ്ഥാപകരിലൊരാളാണ്. ഭാരതീയ രാജ്യതന്ത്രത്തിന്‍െറയും ധനശാസ്ത്രത്തിന്‍െറയും പിതാവായി അറിയപ്പെടുന്നു. 1837ല്‍ ബറോഡ ദിവാനായി. കോണ്‍ഗ്രസ് രൂപവത്കരണത്തിന് നേതൃത്വം നല്‍കിയ അദ്ദേഹം 1886ലെ രണ്ടാം കോണ്‍ഗ്രസ് സമ്മേളനത്തില്‍ അധ്യക്ഷനായി. 1886ലും 1893ലും 1906ലും കോണ്‍ഗ്രസ് പ്രസിഡന്‍റായി.  ഇദ്ദേഹമാണ് ‘സ്വരാജ്’ എന്ന പദം ആദ്യമായി (1906)ല്‍ ഉപയോഗിച്ചത്. ഇന്ത്യയുടെ വന്ദ്യവയോധികന്‍, കോണ്‍ഗ്രസിന് ആ പേര് നിര്‍ദേശിച്ച വ്യക്തി എന്നീ നിലകളില്‍ അറിയപ്പെടുന്നു. ‘Poverty and Un British Rule’, The Daties of zorastrians എന്നീ പുസ്തകങ്ങള്‍ ഏറെ ദ്ധ്രിക്കപ്പെട്ടു. ‘Voice of India’ അദ്ദേഹത്തിന്‍െറ പ്രസിദ്ധീകരണമാണ്. 1917 ജൂണ്‍ 30ന് നിര്യാതനായി.
ലാലാ ലജ്പത് റായ്
പഞ്ചാബിലെ സിംഹം എന്നറിയപ്പെട്ട ലാലാ ലജ്പത്റായ് 1865 ജനുവരി 28ന് ജനിച്ചു. 1897ലും 1900ലുമുണ്ടായ കടുത്ത ക്ഷാമത്തെ നേരിടാന്‍ നേതൃത്വം നല്‍കി. 1920ല്‍ കോണ്‍ഗ്രസ് പ്രസിഡന്‍റായ അദ്ദേഹം 1927ല്‍ ‘ഇന്‍ഡിപെന്‍ഡന്‍റ് പാര്‍ട്ടി’ രൂപവത്കരിച്ചു. 1928 ഒക്ടോബര്‍ 30ന് ലാഹോറിലെത്തിയ സൈമണ്‍ കമീഷനെതിരെ പതിനായിരങ്ങളെ അണിനിരത്തി റായി ജാഥ നയിച്ചു. നെഞ്ചില്‍ മര്‍ദനമേറ്റതിനെ തുടര്‍ന്ന്   1928 നവംബര്‍ 17ന് നിര്യാതനായി.

മദന്‍ മോഹന്‍ മാളവ്യ
  സാമൂഹിക പരിഷ്കര്‍ത്താവും പണ്ഡിതനും വാഗ്മിയുമായ മാളവ്യ 1861 ഡിസംബര്‍ 25 ജനിച്ചു. 1887ല്‍ അധ്യാപിക ജോലി ഉപേക്ഷിച്ച് ദേശീയ പ്രസ്ഥാനത്തില്‍ സജീവമായി. 1909, 1918, 1932, 1933 വര്‍ഷങ്ങളില്‍ ഇന്ത്യന്‍ നാഷനല്‍ കോണ്‍ഗ്രസ് പ്രസിഡന്‍റായി. ഉപ്പുസത്യഗ്രഹത്തിലും നിസ്സഹകരണ പ്രസ്ഥാനത്തിലും പങ്കെടുത്തുവെങ്കിലും അദ്ദേഹം ഗാന്ധിജിയുടെ സ്കൂള്‍-കോളജ് ബഹിഷ്കരണം, വിദേശവസ്ത്രം കത്തിക്കല്‍, തുടങ്ങിയ സമരരീതികള്‍ക്ക് എതിരായിരുന്നു. 1946 നവംബര്‍ 12ന് നിര്യാതനായി.
ഡോ. രാജേന്ദ്രപ്രസാദ്
സ്വതന്ത്ര്യ ഇന്ത്യയുടെ ആദ്യത്തെ രാഷ്ട്രപതിയായ രാജേന്ദ്രപ്രസാദ് 1884 ഡിസംബര്‍ മൂന്നിന് ബിഹാറില്‍ ജനിച്ചു. ഗാന്ധിജിയുടെ നിസ്സഹകരണ പ്രസ്ഥാനത്തില്‍ പങ്കെടുക്കുന്നതിനായി അഭിഭാഷകവൃത്തി ഉപേക്ഷിച്ചു. 1935ലും 1947ലും ഇന്ത്യന്‍ നാഷനല്‍ കോണ്‍ഗ്രസിന്‍െറ അധ്യക്ഷനായിരുന്നു. 1947 മുതല്‍ 1949വരെ ഇന്ത്യന്‍ ഭരണഘടനാ നിര്‍മാണസഭയുടെ അധ്യക്ഷനായിരുന്നു. 1963 ഫെബ്രുവരി 28ന് നിര്യാതനായി.

ദേശബന്ധു ചിത്തരഞ്ജന്‍ ദാസ്
അഭിഭാഷകന്‍, കവി, ചിന്തകന്‍, പത്രപ്രവര്‍ത്തകന്‍ എന്നീ നിലകളില്‍ പ്രശസ്തനായ ദേശബന്ധു ചിത്തരഞ്ജന്‍ ദാസ്1870 നവംബര്‍ അഞ്ചിന് ജനിച്ചു. ബാരിസ്റ്റര്‍ ബിരുദം നേടി ഇന്ത്യയിലെത്തി, 1893ല്‍ കല്‍ക്കത്ത ഹൈകോടതിയില്‍ പ്രാക്ടിസ് തുടങ്ങി. 1905ല്‍ ‘സ്വദേശി മണ്ഡലി’ എന്ന സംഘടനക്ക് രൂപം നല്‍കി. 1906ല്‍ ബാരിസോള്‍ കോണ്‍ഗ്രസ് സമ്മേളനത്തില്‍ സ്വദേശി പ്രസ്ഥാന പ്രമേയം അവതരിപ്പിച്ചു. 1920ല്‍ ജോലി ഉപേക്ഷിച്ച് മുഴുവന്‍ സമയ സ്വാതന്ത്ര്യ സമര പ്രവര്‍ത്തകനായി. 1914ല്‍ ‘നാരായണ’ എന്ന സാഹിത്യ രാഷ്ട്രീയ മാസികയും 1922ല്‍ ഒരു ബംഗാളി വാരികയും 1923ല്‍ ഫോര്‍വേഡ് ദിനപത്രവും ആരംഭിച്ചു. ഇന്ത്യയിലെ ആദ്യ തീവണ്ടി നിര്‍മാണശാല 1950ല്‍ കൊല്‍ക്കത്തക്കു സമീപം സ്ഥാപിച്ചപ്പോള്‍ ദാസിന്‍െറ സ്മരണാര്‍ഥം ചിത്തരഞ്ജന്‍ ഫാക്ടറി എന്ന് നാമകരണം ചെയ്തു. 1925 ജൂണ്‍ 14ന് നിര്യാതനായി.
    
ഭഗത്സിങ്
1907 സെപ്റ്റംബര്‍ 27ന് ജനിച്ചു. ഇന്ത്യന്‍ സ്വാതന്ത്ര്യസമരചരിത്രത്തിലെ രക്തനക്ഷത്രമാണ് ഭഗത്സിങ്. 1907 സെപ്റ്റംബര്‍ 27ന് ‘ഇന്‍ക്വിലാബ്  സിന്ദാബാദ്’ എന്ന മുദ്രവാക്യം മുഴക്കിയത് ഭഗത്സിങ് ആണ്. ഇന്ത്യന്‍ ദേശീയ പ്രസ്ഥാനത്തിന്‍െറ ആവേശമായിരുന്നു ഭഗത്സിങ്. ബ്രിട്ടീഷ് കൗണ്‍സില്‍ മീറ്റിങ്ങിനുനേരെ ബോംബെറിഞ്ഞ കുറ്റത്തിന് ബ്രിട്ടീഷ് പട്ടാളം അറസ്റ്റുചെയ്തുു. എന്തിനാണ് ബോംബെറിഞ്ഞത് എന്ന ചോദ്യത്തിന് ‘ഉറങ്ങുന്നവരെ ഉണര്‍ത്താന്‍’ എന്നാണ് ഭഗത്സിങ് ബ്രിട്ടീഷ് കോടതിയോട് മറുപടി പറഞ്ഞത്. തുടര്‍ന്ന് ബ്രിട്ടീഷ് കോടതി അദ്ദേഹത്തെ 1931 മാര്‍ച്ച് 23ന് തൂക്കിലേറ്റി.

സരോജിനി നായിഡു
ഇന്ത്യന്‍ നാഷനല്‍ കോണ്‍ഗ്രസിന്‍െറ പ്രഥമ വനിതാ അധ്യക്ഷയായ സരോജിനി നായിഡു 1879 ഫെബ്രുവരി 13ന് ഹൈദരാബാദില്‍ ജനിച്ചു. ‘ഇന്ത്യയുടെ വാനമ്പാടി’ എന്നറിയപ്പെടുന്ന സരോജിനി നായിഡു ക്വിറ്റിന്ത്യാ സമരത്തിലും ഉപ്പു സത്യഗ്രഹത്തിലും പങ്കെടുത്തു. ജാലിയന്‍ വാലാബാഗ് കൂട്ടക്കൊലയില്‍ പ്രതിഷേധിച്ച് ബ്രിട്ടീഷ് സര്‍ക്കാര്‍ നല്‍കിയ കേസരി ഹിന്‍ഡ് ബഹുമതി തിരികെ നല്‍കി. സ്വതന്ത്ര ഇന്ത്യയിലെ ആദ്യ വനിതാ ഗവര്‍ണറായി ഉത്തര്‍പ്രദേശില്‍ സ്ഥാനമേറ്റു. ‘ദ ഗോള്‍ഡന്‍ ത്രെഫോള്‍ഡ്’ ‘ബേഡ് ഓഫ് ടൈ’, ‘ബ്രോക്കണ്‍ വിങ്’ തുടങ്ങിയ രചനകളിലൂടെ കാവ്യലോകത്ത് ചിരപ്രതിഷ്ഠ നേടി. 1930ല്‍ ഗാന്ധിജിയും അബ്ബാസ് തായബ്ജിയും അറസ്റ്റിലായതിനെത്തുടര്‍ന്ന് ഉപ്പുസത്യഗ്രഹത്തിന് നേതൃത്വം നല്‍കിയത് സരോജിനി നായിഡുവായിരുന്നു. 1949 മാര്‍ച്ച് രണ്ടിന് നിര്യാതയായി.

പോറ്റി ശ്രീരാമുലു
ചെറുപ്പത്തിലേ ഗാന്ധിയന്‍ പ്രവര്‍ത്തകനായിരുന്നു പോറ്റി ശ്രീരാമുലു. സര്‍ക്കാര്‍ ജോലി ഉപേക്ഷിച്ച് ഉപ്പുസത്യഗ്രഹത്തില്‍ പങ്കെടുത്തു. വൈക്കം സത്യഗ്രഹത്തിലും പങ്കെടുത്തിട്ടുണ്ട്. മദ്രാസ് സംസ്ഥാനത്തിലെ ക്ഷേത്രങ്ങളില്‍ ദലിതുകള്‍ക്ക് പ്രവേശം അനുവദിക്കണമെന്നാവശ്യപ്പെട്ട് 1946ല്‍ അദ്ദേഹം ഉപവാസം നടത്തി. മദ്രാസ് സംസ്ഥാനത്തിലെ തെലുഗു ഭാഷാ പ്രദേശങ്ങള്‍ ചേര്‍ത്ത് ആന്ധ്ര സംസ്ഥാനം രൂപവത്കരിക്കണമെന്ന് ആവശ്യപ്പെട്ട് അദ്ദേഹം 1952 ഒക്ടോബര്‍ 19ന് ഉപവാസം ആരംഭിച്ചു. 56 ദിവസത്തെ ഉപവാസാനന്തരം 1952 ഡിസംബര്‍ 15ന് നിര്യാതനായി. ഇതത്തേുടര്‍ന്ന് കേന്ദ്ര ഗവണ്‍മെന്‍റ് സംസ്ഥാന പുന$സംഘടന കമീഷനെ നിയമിച്ചു. ഫസല്‍ അലിയുടെ നേതൃത്വത്തില്‍ രൂപവത്കൃതമായ കമീഷന്‍െറ റിപ്പോര്‍ട്ടിന്‍െറ അടിസ്ഥാനത്തില്‍ പാര്‍ലമെന്‍റ് 1956ല്‍ സംസ്ഥാന പുന$സംഘടനാ നിയമം പാസാക്കി

Subscribe to കിളിചെപ്പ് by Email
Share:

Total Pageviews

Recent Posts

Popular Posts

Labels

Blog Archive

ടോള്‍ഫ്രീയായ 1098 നമ്പറില്‍ വിളിച്ച് ആര്‍ക്കും കുട്ടികള്‍ക്കു വേണ്ടി സഹായം അഭ്യര്‍ത്ഥിക്കാം.നിങ്ങളുടെ ഒരു ഫോണ്‍‌വിളിയില്‍ രക്ഷപ്പെടുന്നത് ഒരു പിഞ്ചുബാല്യമാണെന്ന് മറക്കാതിരിക്കുക.