ശരീരത്തിൽ അസ്ഥികളുള്ളത് എന്തുകൊണ്ട്?

ശരീരത്തിന്റെ  ഘടനയും ബലവും നിലനിർത്തുക എന്നതാണ് അസ്ഥികളുടെ പ്രധാന ഉപയോഗം. നിരവധി അസ്ഥികൾ ഇണക്കിച്ചേർത്ത ഒരു ചട്ടക്കൂടിനനുസൃതമായാണ് നമ്മുടെ ശരീരം നിർമ്മിതമായിരിക്കുന്നത്. എന്നാൽ ശരീരത്തിനുള്ള ചട്ടക്കൂടായി വർത്തിക്കുക എന്നതു മാത്രമല്ല അസ്ഥികളുടെ ധർമ്മം.

മനുഷ്യ ശരീരത്തിന്റെ  ചലനങ്ങളെ നിയന്ത്രിക്കുന്ന ഒട്ടേറെ പേശികളുണ്ട്. ഇവയെല്ലാം ബന്ധിച്ചിരിക്കുന്നത് അസ്ഥികളിലാണ്. പേശീവ്യവസ്ഥ നിലനിർത്തുന്നതിൽ മറ്റെന്തിനേക്കാളും പ്രധാനപ്പെട്ട പങ്കുവഹിക്കുന്നത് അസ്ഥികളാണ്. എല്ലുകളുടെ ഉള്ളിൽ മജ്ജ എന്നൊരു പദാർത്ഥമുണ്ട്. രക്തത്തിലുള്ള രക്താണുക്കൾ (ചുവപ്പും വെള്ളയും) രൂപം കൊള്ളുന്നത് ഇവിടെയാണ്. എല്ലുകളിലൂടെ കടന്നുപോകുന്ന സൂക്ഷ്മ രക്തക്കുഴലുകളിലൂടെ ഈ അണുക്കൾ  രക്തപ്രവാഹത്തിൽ കടക്കുന്നു.