സാധാരണ കടലാസുകൾക്ക് വെളുപ്പു നിറം എന്തുകൊണ്ടാണെന്നറിയാമോ?

വിവിധതരം കടലാസിന്റെ നിറവും, തരവുമൊക്കെ നിശ്ചയിക്കുന്നത് അതുണ്ടാക്കുന്ന വിധമാണ്. തടിയാണ് പ്രധാന അസംസ്കൃതവസ്തു. തടി അരച്ച് പൾപ്പാക്കുകയാണ് ആദ്യപടി. ഇത് രണ്ടു തരത്തിലാണ് ചെയ്യുക. തടി വെള്ളം ചേർത്ത് അരച്ചെടുക്കുകയാണ് ഒരു മാർഗ്ഗം. ഇത്തരം പൾപ്പിൽ നിന്നുള്ള കടലാസിന് ഈട് കുറവാണ്. നമ്മുടെ പത്രങ്ങൾ മിക്കതും ഇത്തരത്തിലുള്ള കടലാസാണ് ഉപയോഗിക്കുന്നത്.
       
തടി തീരെ ചെറിയ കഷണങ്ങളാക്കി ക്ഷാരലായനിയിൽ ഉന്നതമർദ്ദത്തിൽ വേവിച്ചെടുക്കുന്നതാണ് രണ്ടാമത്തെ മാർഗ്ഗം. പുസ്തകങ്ങൾക്കും മറ്റുമുള്ള കടലാസ് നിർമ്മിക്കുന്നത് ഇങ്ങനെയാണ്. ഇങ്ങനെ നിർമ്മിക്കുന്ന പൾപ്പ് ബ്ലീച്ച് ചെയ്ത് വെളുപ്പിച്ചെടുക്കേണ്ടതുണ്ട്. മാലിന്യങ്ങൾ കളയുന്നതിന്, പൾപ്പ് കഴുകി അരിച്ചെടുത്ത്,  ആവശ്യമെങ്കിൽ ബ്ലീച്ച് ചെയ്തതിന് ശേഷം പാളികളായി ഉണക്കിയെടുക്കുന്നു. മില്ലിൽ ഇവ വീണ്ടും വെള്ളം ചേർത്തരച്ച് ചീനക്കളിമണ്ണ്, നിറങ്ങൾ, റെസിനുകൾ മുതലായവ കൂട്ടിച്ചേർക്കുന്നു. അതാര്യത വർധിപ്പിക്കുകയാണ് കളിമണ്ണിന്റെ ധർമ്മം. മഷി പടരുന്നത് കുറക്കുന്നതിനാണ് റെസിനുകൾ. നിറവസ്തുക്കൾ കടലാസിനാവശ്യമായ നിറം നൽകാനും.

വെള്ളക്കടലാസ് ഉണ്ടാക്കാൻ ടൈറ്റാനിയം ഓക്സൈഡും, ചോക്കുപൊടിയുമാണ് ചേർക്കുക. ചീനക്കളിമണ്ണും ഒരളവ് വരെ ഇതിന് സഹായിക്കുന്നു. ഇങ്ങനെ തയ്യാറാക്കുന്ന പൾപ്പ് ഭാരമുള്ള നിരവധി റോളുകൾക്കിടയിലൂടെ കടത്തിവിട്ട് പരത്തി ഉണക്കിയെടുക്കുമ്പോഴാണ് കടലാസ് രൂപം കൊള്ളുന്നത്.

വികസിതരാജ്യങ്ങളിൽ പരിസ്ഥിതി സംരക്ഷണാർത്ഥം വിദ്യാഭ്യാസസ്ഥാപനങ്ങളും മറ്റും E-paper ലേക്ക് മാറിക്കൊണ്ടിരിക്കുകയാണ്.