മുല്ലാ നസറുദീനും ഭാര്യയും വിശ്രമിക്കുകയാണ് . അവര്‍ പരസ്പരം പുറംതിരിഞ്ഞാണ് ഇരിക്കുന്നത്. ഭാര്യ പുറത്തേക്ക നോക്കുന്നു, മുല്ല ചുമരിലെക്കും . പെട്ടെന്ന് ഭാര്യ പറഞ്ഞു." നോക്ക് നഗരത്തിലെ ഏറ്റവും പണക്കാരനായ ആള്‍ മരിച്ചു. അയാള്‍ക്ക് അന്ത്യയാത്ര പറയാനായി ആയിരക്കണക്കിനു് ജനങ്ങള്‍ പൊയ്ക്കൊണ്ടിരിക്കുന്നു" . നസറുദീന്‍ പറഞ്ഞു ."എന്തൊരു കഷ്ടം, എനിക്ക് കാണാന്‍ പറ്റില്ലല്ലോ, ഞാനിരിക്കുന്നത് അങ്ങോട്ട്‌ തിരിഞ്ഞല്ലല്ലോ" .
ഒന്ന് നേരെ നോക്കിയാല്‍ കാണാന്‍ കഴിയുന്ന, കാണേണ്ട ഒട്ടേറെ കാഴ്ചകളുണ്ട്‌ . അവിടെ നിന്ന് മുഖം തിരിക്കരുത്. എല്ലാ കാഴ്ചകളും കാണണമെന്നില്ല. പക്ഷെ കണ്ടിരിക്കേ ണ്ടതൊന്നും നഷ്ടമാകരുത്. കണ്ണടച്ചിരിക്കുന്നതിനെക്കാള്‍ ഭയാനകമാണ് പുറംതിരിഞ്ഞിരിക്കുന്നത്. പുറം തിരിഞ്ഞിരിക്കുന്നവര്‍ ഒരു പ്രതീകമാണ്‌. എല്ലാ നിഷ്ക്രിയ മനോഭാവങ്ങ്ളുടെയും.
കാഴ്ച ഒരനുഗ്രഹമല്ല . കാണാനുള്ള മനോഭാവമാണ് അനുഗ്രഹം .
പലരും തള്ളിക്കളഞ്ഞ ചെറിയ കാഴ്ചകള്‍ പിന്നീട് വലിയ വിപത്തുകളായിട്ടുണ്ട് . ചിലതൊക്കെ അത്ഭുതക്കാഴ്ചകളും .
കണ്ണട വച്ചാല്‍ കാഴ്ച മാത്രമേ മാറൂ, ഉള്‍ക്കാഴ്ച മാറില്ല . കണ്ണ് കൊണ്ട് മാത്രമല്ല ഹൃദയം കൊണ്ട് കൂടി കാണണം . കണ്ണില്ലാത്തവരും കാണുന്നുണ്ട്. അവര്‍ കണ്ട സ്വപ്‌നങ്ങള്‍ കാഴ്ചയുള്ളവര്‍ക്ക് വഴി കാട്ടിയായിട്ടുണ്ട്. കാഴ്ച അനിവാര്യമല്ല , പക്ഷെ കാഴ്ചപ്പാട് അത്യന്താപേക്ഷിതമാണ് . നോക്കുന്ന ദിശ മാറിയാല്‍, അടച്ചിട്ട ജനാലകള്‍ തുറന്നു വച്ചാല്‍, ദൃശ്യങ്ങള്‍ കൂടുതല്‍ ആകര്‍ഷകമാകും .
0 Comments