പല രാജ്യങ്ങളിലും പല സമയം കാണിക്കുന്നത് എന്തുകൊണ്ടാണന്നറിയാമോ?

ഗോളാകൃതിയിലുള്ള ഭൂമിയുടെ ( ഭൂമിക്ക് കൃത്യമായ ഗോളാകൃതിയല്ല) ഉപരിതലത്തിലാണല്ലോ രാജ്യങ്ങൾ സ്ഥിതി ചെയ്യുന്നത്. ഭൂമി തിരിയുമ്പോൾ വിവിധ പ്രദേശങ്ങൾ മാറി മാറി സൂര്യന്റെ ദിശയിലേക്ക് വന്നും അകന്നും ഇരിക്കും. സൂര്യപ്രകാശം ഗോളാകൃതിയിലുള്ള ഭൂമിയുടെ എല്ലായിടത്തും ഒരേ സമയം പതിക്കുക സാധ്യമല്ലെന്ന് വ്യക്തം. അതിനാൽ തന്നെ എല്ലാ രാജ്യത്തും രാപ്പകലുകൾ ഉണ്ടാവുന്നത് ഒരേ സമയത്തല്ല.
     
 നമ്മുടെ ദിനചര്യയും വാച്ചിലെ സമയവുമായി അഭേദ്യമായ ബന്ധമുണ്ടെന്ന് അറിയാമല്ലോ. (വാസ്തവത്തിൽ ദിനചര്യ ക്രമപ്പെടുത്തുന്നത് സൂര്യന്റെ ഉദയാസ്തമയമാണ്). ഓരോ രാജ്യത്തും ശരാശരി ( ഒരു കൊല്ലത്തിൽ) അതാത് രേഖാംശ രേഖയുടെ നേരെ മുകളിൽ സൂര്യൻ എത്തുന്ന സമയം ഉച്ചക്ക് 12 മണിയായി എടുക്കുന്നു. അപ്പോൾ വ്യതസ്ത രേഖാംശരേഖയിൽ സ്ഥിതി ചെയ്യുന്ന സ്ഥലങ്ങൾക്ക് വ്യത്യസ്ത സമയമാവും.ഒരു രാജ്യത്തിൽ സാധാരണ ഒരു രേഖാംശ രേഖയെ അടിസ്ഥാനമാക്കി സമയം ക്രമപ്പെടുത്തും. ഈ സമയത്തെയാണ് ആ രാജ്യത്തിന്റെ സ്റ്റാൻഡേർഡ് സമയം എന്നു പറയുന്നത്.
ഇന്ത്യൻ സ്റ്റാൻഡേർഡ് സമയം 81 1/2 ഡിഗ്രി പൂർവ്വരേഖാംശത്തെ ആധാരമാക്കിയാണ് കണക്കാക്കുന്നത്.