 |
വീരപൂജ
ഉന്നിദ്ര നവാശയപ്പനിനീര്‍ മലര്‍ചൂടി,
സുന്ദര നവോദയ പരിവേഷവുമായി,
സ്‌പര്‍ശന വിദ്യുദ്വീചിപരത്തി ക്ഷണാലൊരു
ദര്‍ശനമുരളി, യാവീര ഭാരതസിംഹം!
നിദ്രവിട്ടുണരുവാ, നാലസ്യം കഴുകുവാന്‍,
ക്ഷുദ്രചിന്തതന്‍ മാമൂല്‍ക്കോട്ടകള്‍ തകര്‍ക്കുവാന്‍,
വിമലസ്‌നേഹാരാമം തീര്‍ക്കുവാന്‍ സത്യോജ്വല-
സമതാശോഭം നവഭാരതം പണിയുവാന്‍,
അന്തസ്സുറ്റൊരു കുലം കെടുത്തി,പ്പടിതോറും
തെണ്ടുവാന്‍ പായും ഭിക്ഷാപാത്രങ്ങളുടയ്‌ക്കുവാന്‍,
സര്‍ഗശക്‌തി തന്‍ പുരോഗതിയെത്തിന്നും സ്വാര്‍ത്ഥ-
വര്‍ഗ ചിന്ത തന്‍ കരിമൂര്‍ഖനെത്തുരത്തുവാന്‍
ആഹവ ഭേരീരവം മുഴക്കി ദിഗന്തങ്ങള്‍-
ക്കാഹ്വാനമരുളി നീ വീരഭാരതശില്‌പി!
പി. കുഞ്ഞിരാമന്‍ നായര്‍
രാഗമാലിക
കൈകളില്‍സ്സയന്‍സേകും
കര്‍മശക്‌തി തന്‍ വീര്യം;
കരളില്‍ ഫലാനപേക്ഷം
കതിരിടും ശുദ്ധസ്‌നേഹം;
കലതന്‍ ദിവ്യലാവണ്യം
കമനീയം ധര്‍മബോധം;
നവധീര നരവര്‍ഗം
ജവാഹര്‍ ലാലിന്‍ സ്വപ്‌നം
എന്‍.വി. കൃഷ്‌ണവാരിയര്‍
ഗുരുസന്നിധിയില്‍
ജനകോടികള്‍ക്കെല്ലാം
മാര്‍ഗദ്വീപമാം ഭവാന്‍
ജയിലും വീടും രണ്ടായ്‌-
ക്കണ്ടതില്ലൊരുനാളും.
ത്വല്‍ക്കരം പരക്കാത്ത
ഭാഗമെങ്ങവനിയില്‍
ത്വല്‍ക്കര്‍മം പുകഴ്‌ത്താത്ത
ജിഹ്വയേതവനിയില്‍?
ഈടെഴും ജനപദ-
മാക്കിയീ മഹാരാജ്യം
ഷോഡശ സംവത്സരം
നയിച്ച രക്ഷാമൂര്‍ത്തേ,
ഇന്നു ഞങ്ങളോടൊന്നി-
ച്ചില്ലല്ലോ ജഗത്തിന്റെ
കണ്ണുപോല്‍ തിളങ്ങിയ
പൂര്‍ണമാനവന്‍ ഭവാന്‍!
വെണ്ണിക്കുളം
0 Comments