മഴക്കാലം തുടങ്ങുമ്പോൾ തവളകൾ പേക്രോം.. പേക്രോം.. എന്ന് ബഹളം വയ്ക്കുന്നത് എന്തുകൊണ്ട്?

മിക്ക ജാതി തവളകളും മുട്ടയിടുന്നത് വെള്ളത്തിലാണ്. ഇതുകൊണ്ട് ഇവയുടെ പ്രജനന കാലത്തിന് മഴക്കാലവുമായി ബന്ധമുണ്ട്. മഴക്കാലം ആരംഭിക്കുന്നതോടെ ആൺ തവളകൾ ഇണയെ ആകർഷിക്കാനായി ഗംഭീര സംഗീത മത്സരം തുടങ്ങുന്നു. പലജാതി തവളകളുടേയും  ശബ്ദങ്ങൾ പല തരത്തിലും താളത്തിലുമുള്ളതാണെങ്കിലും സ്വന്തം ഇണയെ തിരിച്ചറിയുവാനുള്ള കഴിവ് എല്ലാ തവളകൾക്കുമുണ്ട്.

സാധാരണ ഏറ്റവും ഉയർന്ന ശബ്ദത്തിൽ പാട്ടുപാടുന്ന ആൺ തവളകളുടെ അടുത്തായിരിക്കും ഇണകൾ ആദ്യം ചാടിയെത്തുകഇ. ശ്വാസകോശങ്ങളിൽ നിന്ന് ശക്തിയായി പുറത്തേക്കും അകത്തേക്കും സഞ്ചരിക്കുന്ന വായു തവളയുടെ ശബ്ദതന്തുക്കളിൽ തട്ടി  ശബ്ദമുണ്ടാക്കുന്നു. അതേസമയം തവളയുടെ വായുടെ അടിത്തട്ടിലുള്ള ഒന്നോ രണ്ടോ വായു സഞ്ചികൾ  ബലൂൺ പോലെ വീർക്കുകയും അത് ഒരു ശബ്ദവർധിനിപോലെ   പ്രവർത്തിച്ച് ഒച്ച  വളരെയധികം കൂട്ടുകയും ചെയ്യുന്നു.